Aida Nuño

Aida Nuño ye una ciclista sierense, considerada la meyor ciclista española na disciplina de ciclocross, con 7 campeonatos nacionales élite y 2 junior. Sicasí, nun ye la única disciplina que probó na so trayectoria profesional, yá que corrió nel 2014 en ciclismu en carretera, onde tamién consiguió delles victories. Tres de cuasi una vida lligada a la marca asturiana MMR Bikes, l’asturiana cambió pa TREK nel 2019 hasta anguaño. El so meyor llogru nos campeonatos mundiales de ciclocross foi un octavu puestu. Y tovía sigue corriendo, polo que la lleenda sigue medrando.

Marta Piquero

Marta Piquero ye una xugadora de hockey patines ñacida en L.lena, que xuega d’atacante nel Club Patín Xixón Solimar na OK Liga Femenina, la primer división de la disciplina. Tien namás 23 años, pero ye edá suficiente pa llograr dellos títulos, yá que lleva nel mundu del hockey profesional dende los 15 años. Na so trayectoria foi quien a ganar dos OK Liga, dos copes de la Reina y una Copa d’Europa.

Sara Moro

Sara Moro ye una ex-ximnasta asturiana, especializada na disciplina de ximnasia artística, olímpica nos XXOO de Sidney 2000 y Atenas 2004, llogrando en dambos un diploma olímpicu, al quedar en 4ª y 5ª posición. Tamién tien delles medalles internacionales, amás de ser campeona d’España nel añu 2000. Tres les olimpiaes del añu 2004, decidió retirase y estudiar Fisioterapia n’Uviéu y, anguaño exerce d’ello en Madrid.

Rosa Fernández

Rosa Fernández ye una escaladora asturiana, ñacida en Cangas del Narcea y que consiguió facer 6 de les 14 cumbres de más d’ocho mil metros, ente elles l’Everest. Hasta agora, ye la única muyer española que consiguió completar el Proyecto 7 Cumbres, escalando les montañes más altes de tolos continentes. Amás d’esto, ye aficionada al ciclismu de montaña.