Bruno Fernández Cepeda
Nació en Villaviciosa, na parroquia de San Vicente de la Palma en 1744. Clérigu, foi preceptor de llatinidá y dedicóse al estudiu y al enseñu de la Gramática. En Villaviciosa perteneció al círculu d’amigos ilustraos de Francisco de Paula Caveda. Yera conocíu col alcuñu del Dómine. De la so obra consérvense tres poemes n’asturianu. Morrió en Villaviciosa en 1803.
Antón Balvidares Argüelles
Nació en Balvidares, conceyu de Sariegu, en 1751. A diferencia de la mayor parte de los otros escritores ilustraos, nun pertenecía al estamentu relixosu. Vivió la mayor parte del tiempu na posesión de Loto, nel conceyu de Nava, onde morrió tovía xoven en 1792. Namás se conserven les obres que publicó Caveda en 1839, ainda que se sabe qu’escribió más que nun tán localizaes.
Xuan González – Villar y Fuertes
Naz en Lluanco en 1746 y muerre en Llión, onde yera Deán de la Catedral, en 1820. D’esti autor namás se conoz un llargu poema n’octaves reales. La Xuditt, escritu en 1770 y publicáu per vez primera en 1990. De les obres que nos llegaron del sieglu XVIII ye la más claramente influyida por Antón de Mari-Reguera, lo que-y valió’l pocu apreciu de Caveda (ésti, como bon románticu, refuga la lliteratura del barrocu) y que rodara inédita hasta fecha tan reciente.
Xosefa de Xovellanos
Nació en Xixón en 1745 y morrió na mesma ciudá en 1807. Yera la hermana pequeña de Gaspar Melchor. Vilba dende mui nueva, ensin descendencia, dedicó la vida a ayudar a les muyeres desvalíes, creando instituciones pa ello. Profesó comu monxa nes aguestines de Xixón en 1793. Esta escritora, la primer muyer conocida de la nuesa lliteratura, ye la más destacada de los autores del XVIII, y na so obra puen atopase elementos que definen la lliteratura ilustrada más qu’en nengún otru autor: la crítica delantre les desigualdaes sociales y la denuncia del comportamientu de les clases nobles.
