Siguiendo'l mes de la muyer pero centrándonos en daqué más actual, queremos centranos güei nestes asturianes que son líderes nos sos distintos ámbitos.
Adriana Lastra
Nació en Ribesella en 1979 y ensin movese d'Asturies empezó la so andadura nel mundu de la política formando parte de Mocedaes Socialistes de Ribesella a los sos dieciocho años.
Nel 2007 foi escoyida diputada na Xunta Xeneral del Principáu d'Asturies de la zona del Oriente. Dellos años más tarde encabezó la llista al Congresu de los Diputaos pol Partíu Socialista Obreru Español nes elecciones xenerales.
Foi un de los sofitos determinantes na decisión del actual Presidente del Gobiernu pa participar nes elecciones primaries de 2017 y, al ser escoyíu Adriana convertióse na mano derecha y Vicepresidenta Xeneral del Gobiernu estatal. Gracies a esto consiguió convertise na persona más xoven n'ocupar el puestu de vicepresidenta na hestoria del partíu.
_______________________________________________________________________________________________________
Loreto Ordoñez
Llicenciada pola Universidá d'Uviéu n'Inxeniería de Mines, Loreto Ordoñez foi escoyida una de les Top 100 Muyeres Líderes n'España dientro de la categoría de «Alta Dirección».
En graduándose na Universidá asturiana nun dexó de formase y anguaño lleva más de dos décades nel sector enerxéticu. Nesti tiempu ocupó dellos cargos importantes dientro de la empresa «Engie» y, dende fai casi 10 años, ocupó la dirección xeneral del grupu.
Dientro d'esta empresa consiguió crear diversos espacios tresversales pal diálogu y el trabayu n'equipu col fin de potenciar el talentu femenin. Amás ye impulsora d'iniciatives pa potenciar el papel de la muyer dientro d'una empresa, como la Plataforma WIN (Women in Networking) qu'impulsa la visualización del capital femenín dientro de la compañía.
_______________________________________________________________________________________________________
Sofía Castañon
Xixonesa dende payares de 1983, Sofía Castañón ye una poetisa, escritora y realizadora visual. Sicasí, a Sofía conocémosla pola so presencia na política española.
Siendo miembru del Conseyu Ciudadanu de Podemos en Xixón, en 2015 allegó nes primaries de Podemos promovida pola dirección nacional de Pablo Iglesias y resultó ser la candidata más votada.
Faciendo usu de la llingüa na Sesión Constitutiva del Congresu de la XI Llexislatura prometió'l so cargu de la siguiente forma: «Prometo acatar esta Constitución y trabayar pa cambiala. Pola alcordanza de les nueses güeles, pol futuru de los nuesos fíos. Nunca más un país sin su xente y pueblos.»
A lo último, fai casi cinco años foi escoyida Secretaria de Feminismos Interseccional y LGTBI.
_______________________________________________________________________________________________________
Eva Pando Iglesias
Nació en Moreda d'Ayer en 1971 ta llicenciada pola Universidá d'Uviéu en Inxeniería Industrial. Dende fai casi una década ye la Directora Xeneral del Institutu de Desenvolvimientu Económicu del Principáu d'Asturies (IDEPA).
Dientro de la so carrera llaboral tamién ta presente nel Conseyu d'Alministración de la Sociedá pal Desenvolvimientu de les Contornes Mineres y ye vocal en dellos patronatos rellacionaos cola tecnoloxía.
La so responsabilidá dientro de los sos proyectos toca diversos campos: dende inversiones y finances hasta innovación ya internacionalización.
Ensin dulda, dexó buelga no rellacionao al sector tecnolóxicu y d'innovación del Principáu d'Asturies.
