Si hai dalgo que tenemos n'Asturies son paisaxes espectaculares que podemos atopar dende l'oriente hasta l'occidente. Por ello, güei amosémosvos 4 miradores espectaculares de los qu'esfrutar esti branu.

Mirador de San Roque

Esti miradoriu atópase nuna de les villes costeres más guapes y famoses de la mariña asturiana, Llastres . Dende él puede esfrutase d'unes espectaculares vistes del pueblu, la mariña asturiana y los Picos d'Europa. Puede aportase a él tantu en coche, yá que cunta con una zona d'aparcamientu, como caminando. Pa aportar a él a pie aconséyase llevar calzáu cómodo ya que daqué que caracteriza a esti pueblu son les cuestes y xubíes que tien. Nesti puntu atópase tamién un área recreativa que cunta con barbacoes, fontes, meses… y amás, ellí tamién ta asitiada la Capiya de San Roque.

Mirador del Fitu

Trátase d'un de los miradorios más famosos d'Asturies y ta asitiáu a 1.100 metros sobre'l nivel del mar. Foi inauguráu nel añu 1927 y la so construcción foi un exemplu de collaboración ciudadana yá que hubo numberosos donativos llegaos de tol territoriu. Atópase en plena Sierra del Sueve puede esfrutase d'unes vistes de 360 graos úniques de los Picos d'Europa, la Reserva Natural de Sueve, el Parque Natural de Ponga o la mariña asturiana nun día asoleyáu. Dispón tamién d'una amplia zona d'aparcamientu que cunta con un tienda de productos típicos asturianos y un chigre. Cabe destacar qu'esta área ye'l puntu de partida de numberoses rutes que pueden facese na redolada.

Mirador de la Regalina

Atópase en Cadavéu y al llau d'esti miradoriu ta la guapa y conocida hermita de La Regalina. Nun ye un mirador puramente dichu pero ye un de los meyores balcones al Cantábricu nel corazón del Paisaxe Protexíu de la Mariña Occidental. Ye l'escenariu d'una de les fiestes más conocíes n'Asturies, que se celebra l'últimu domingu d'agostu. Dende esti mirador podrá esfrutase del paisaxe del cabu Bustu, el cabu Vidio o la sablera de Cadavéu.

A Paicega

En Pezós atópase un antiguu pobláu construyíu nel sieglu XX que tenia la finalidá d'acoyer a los obreros que trabayaben na construcción de la presa del banzáu de Salime (A Paicega). Esisten rutes dende Pezós que lleguen hasta'l mirador pero tamién puede aportase en coche. Dende esti llugar pueden reparase restos d'estes edificaciones. La meyor caltenida ye una ilesia que permanez zarrada y non puede visitase. Dende lo alto del miradoriu hai una vista única y perfecta del cursu del ríu Navia y les sierres que la arrodien.