Mardom

Mardom, artista xixonés, entamó bien pronto a interesase pol mundu de la música, principiando con ocho años a tocar la guitarra. Tiempu dempués, cola inquietú de crear la so propia música, arródiase de dellos músicos escelentes pa formar un grupu y col que principiar a grabar, sacando’l EP Me voy. Anguaño, alcuéntrase grabando’l so primer álbum, con estilos del propiu artista y ritmos afroamericanos. 

Tania Pereira

Tania Pereira ye una cantante y compositora de Xedré (Cangas del Narcea), qu’entama nel mundu musical gracies al llabor de so pá, nel grupu Brandal. Dempués d’esti primer proyectu y yá afincada en Londres, arranca la so carrera como solista y llanza l’EP Camino Lejano nel 2015. L’artista ta acabante d’asoleyar el so primer trabayu, Un sueño dentro de un sueño, con lletres orixinales n’asturianu y castellanu y con el poema de Gil de Biedma, Nun volveréi a ser xoven.

Kal Vivo

Kal Vivo ye un grupu musical qu’arranca nel añu 2018 col interés pola poesía de la componente Alma Hidalgo, qu’entamaba a escribir, mientres que Raúl Hidalgo ponía la música a eses lletres. Liberatus ye’l nome del so primer cantar y el grupu s’alcuentra trabayando nel so primer discu, nel qu’intenten reflexar la realidá billingüística d’Asturies con ritmos de folk asturianu, rock y reggae, ente otros. 

Abéu Folk

Abéu ye un grupu de música folk formáu por cuatro mozos interesaos pola música tradicional d’Asturies, onde la percusión ye esencial. Esti conxuntu ñaz nel añu 2018 con un repertoriu de cantares tradicionales con enfoque diferente y modernu col oxetivu d’averar la música tradicional a la xente más mozo y fomentar esti xéneru. Los sos dos primeros temes lleven por nome Dame tira y Re3mbáu.