Teatru Prendes (Candás)

El teatru Prendes de Candés inauguróse el 1 de xineru de 1956, proyectando la película The Naked Jungle (que se conoció en castellán col nome de Cuando ruge la marabunta). En xunetu de 1993, coles mires de promocionar cualquier tipu d'actividá Socio-Cultural dientro de les sos instalaciones y otres pudieren desenvolvese nel conceyu de Carreño, constrúyese'l Patronatu Centro Cultural Teatru Prendes. Ente tolo qu'ufierta, destaquen ciclos de cine, como'l ciclu de cine clásicu, o'l salón del teatru costumbrista asturianu de Candás, bien conocíu y prestixosu n'Asturies. Destaca tamién pol so ciclu añal de música, con una temática pa cada estación del añu.

Teatru Vital Aza (L.lena)

El teatru Vital Aza inauguróse el 5 d'agostu de 1954 proyectando la película Duel in the Sun (Duelo al sol) y foi'l resultáu d'una propuesta que tenía'l fin d'apurrir una mayor ufierta d'ociu en Pola de L.lena. Amás de cine y teatru, podemos esfrutar de delles gales, congresos, conferencies, esposiciones, conciertos… Pero si dalgo nos presta pola vida d'esti teatru ye l'usu que se fai del asturianu a la de promocionar les sos actividaes.

Teatro Xovellanos (Xixón)

Nun hai dulda de que'l teatru Xovellanos ye un de los símbolos más reconocibles de Xixón. Anque non siempres tuvo esi nome. Cuando s'inauguró allá per xunetu de 1899, llevaba'l nome del so fundador: Manuel Sanchez Dindurra. Nome qu'entá caltien la cafetería que tien al llau. Na Guerra Civil tuvo en manes del Control d'Espectáculos Públicos de la República y usóse pa representar actos políticos y obres teatrales y espectáculos afines a la causa republicana. Foi por eso qu'en 1937 foi bombardeao. El teatru reconstruyise en 1942 col nome de “Xovellanos”, anguaño ye espaciu habitual d'un montón d'espectáculos teatrales y musicales perinteresantes, amás de delles gales como la ceremonia del Festival de Cine de Xixón.

Teatru Campoamor (Uviéu)

El bien conocíu teatru Campoamor nació en 1892, cuando Uviéu crecía tocantes a la burguesía y el estatus social de los sos habitantes. D'esta forma, empezó a haber demanda d'ópera, y obres de teatru de temática burguesa, polo que abrióse esti teatru. La primer obra en representase foi Les Hugonottes, y acabó convirtiéndose nun claru exemplu de la burguesía uveína. Quiciabes por eso na revolución de 1934 quedó casi amenorgada a escombros, quedando intacta namás que la fachada principal. Al acabar la guerra civil, reconstruyóse y volvióse a abrir en 1948. Entá agora ye un de los principales llugares de pelegrinaxe pa los fans de la ópera d'Asturies, amás d'agospiar dellos conciertos, espectáculos y gales, ente les que destaquen los Premios Princesa d'Asturies, unos premios bien prestixosos qu'acueyen a delles de les personalidaes más importantes del mundu de les artes, les ciencies y la cultura.