L’amagüestu de difuntos

Ún de los vezos con mas arraigu n’Asturies yera’l de facer amagüestos, una reunión que se facía delles vegaes ente la seronda y l’iviernu. Sicasí, nesta ocasión tenía daqué especial, pues na viéspera de Tolos Santos dexábase un puñáu de castañes embaxo d’un tapín de yerba pa quitar la fame de los difuntos. Si dalguna d’estes castañes restallaba, significaba que daquién consiguiera salir del purgatoriu. Esta tradición vino faciéndose hasta los años 40 del sieglu pasáu, y tien munches semeyances cola tradición mexicana de Día de Muertos. 

L'aguinaldu

Mesmo que la tradición d’Estaos Xuníos nestes mesmes feches o que n’ Antroxu, la xente más mozo salía cola cara entafarrada de ceniza y ensin disfrazase a pedir cantando peles cases d’alredor. Les recompenses yeren varies, ente les que taben castañes, ablanes o chorizu, anque la recompensa estrella yeren los frixuelos. Nesti sen, si los dueños de la casa nun-yos apurriaben nada, los mozos y moces cantaben un cantar escontra d’ellos. 

Calabaces como adornu

Anque agora venceyemos la tradición de vaciar les calabaces al vezu americanu, esta xera ta enforma documentada nel norte d’España hasta la segunda metá del sieglu XX. Les calabaces, colocaes nos cruces de caminos, puertes y ventanes (ehí onde apaecíen les ánimes) yeren vaciaes pola mocedá, que dempués enllenaba con veles illuminaes. 

Los barcos queden en puertu

En munchos de los pueblos pesqueros qu’hai na costa asturiana, los pescadores nun salíen a faenar na viéspera de Tolos Santos. Esto yera por mieu a que de les redes de pesca salieren los güesos de tolos pescadores que morrieren faenando na mar. Anque esto nun yera l’únicu peligru; cunta una leyenda en Cuideiru qu’una vegada salieron dos pescadores a faenar y nos alredores de la Concha d’Artéu alcontraron una montonera de güesos con veles que punxera ellí la Güestia.

La güestia

La güestia ye un personaxe mitolóxicu con muncha importancia nestes feches. Tratase d'una procesión nocherniega d'almes en pena qu'anda pelos caminos diciendo “Andai de día que la nueche ye mia". Nun principiu, esta fatídica procesión namás podía ser vista por quien tuvieren esi don, que se dicía que s'adquiría polos bautizaos colos olios d'unxir a los muertos o cola estola negra que'l cura emplega en Xueves Santu. Dícense qu'aquel que la viera morrería al poco tiempu, cuidao que constitutúa un badagüeyu mortal, sacantes que se tomaren determinaos precuros.