Festival de la ablana de L'Infiestu (Piloña)

Tolos años, la primer fin de selmana d'ochobre L’Infiestu ufierta una cita cultural y divertida de gran tradición que cunta con un programa d'actividaes festives venceyaes al mercáu tradicional, esposición d'artesanía y productos agroalimentarios, esposición d'aves, esposición d'artesanía de la madera, campeonatos de bolos, etc. Un homenaxe a un fruto qu'en Piloña cada vez cobra más importancia y con una calidá suprema.

Nueche d’ánimes

Los celtes interpretaben el fin del bon tiempu y de la fertilidá de la tierra como'l fin del añu celta, y pensaben que la última nueche del añu, cuando l'añu morría, los muertos llevanten de les sos tumbes caminando polos poblaos. D'equí salen lleendes bien conocíes como la de la santa compaña en Galiza o la güestia n'Asturies que diba polos montes y los pueblos glayando “Andai de día que la nueche ye mía". Estes almes en pena que sirvíen de guía a los muertos más recién, nun suponíen un peligru pa los vivos, pero si éstos atopábenlos y tocábenlos sufriríen el mesmu destín. Les tradiciones rellacionaes con estes lleendes anguaño son cada vez más frecuentes.

Mayar mazanes

La seronda ye, davezu, el tiempu de facer sidra, nel que recoyemos y mayamos les mazanes. Tratase d'una costume bien representativa d'Asturies y que ta claro que llevala a cabu correctamente ye fundamental pa una bona sidra. La forma tradicional, casi n'estinción, nel que s'echen les mazanes nun “duernu” (una especie de escudiella onde se mayan les mazanes). Mayar una mazana nun ye una xera fácil, y d'antiguo solía facese ente dellos, y por xente con brazos fuertes y bien preparaos pa ello. El so trabayu consistía en golpear les mazanes con muncha fuerza, rapidez y en sincronía col restu de xente pa torgar que la mazana escape pelos llaos. Sicasí, anguaño úsase xuna máquina llamada «mayadora».

Amagüestu

Davezu l'amagüestu ta asociáu al consumu de la castaña, esi alimentu básicu de la nuesa cultura tradicional que pela seronda entamen a adornar el paisaxe asturianu. Sentámonos en prau con collacios y familia nun ambiente prestosu, colocando les casteñes al fueu, pegando-yos un ximielgu con un palu pa que reciban dafechu el calor. Al terminar esfrutamos del so sabor moyando’l gargüelu con un vasín de sidra dulce, esa que tanto-yos presta a los neños, igual qu’el xugar nel prau al aire llibre, en metá de dalguna viesca recibiendo los últimos rayos de sol del añu.