L'últimu mes, Candás pudo acoyer en directu'l rodaxe de Un asunto privado, la nueva serie qu'Amazon Prime Video ta preparando al través de la productora Bambú Producciones.
La serie rodóse en dellos rincones de Galiza como la localidá d'A Guarda, el balneariu d'O Carballiño y les ciudaes de Vigo y Pontevedra. La serie fixo una parada, amás, nos almacenes de trenes de la Feve en Candás, onde tuvieron rodando a finales del mes pasáu.
La serie, creada por Teresa Fernández Valdés, Ramón Campos y Xema R. Neira, va constar de 8 capítulos que van poder esfrutar hasta un total de 240 países y territorios, anque nun tien entá fecha fixa d'estrenu.
El repartu va tar encabezáu por Jean Reno y Aura Garrido, que tuvieron nel rodaxe de Candás, y promete ser un thriller d'época qu'entemez de misteriu, romance, humor y acción.
Un asunto privado va cuntar la hestoria de Marina Quiroga (Aura Garrido), una moza atrevida de clase alta con alma de policía. Esta muyer propónse dar caza al asesín en serie qu'acecha dende va meses la ciudá. Faelo cola ayuda del so fiel mayordomu, Héctor (Jean Renu). Él ye un home discretu y servicial que la so sensibilidá y audacia asitienlu siempres nel puntu clave de la investigación. Xuntos van lluchar contra toles torgues pa llogralo y nin los prexuicios de xéneru d'aquella dómina nin la resistencia del nuevu comisariu van torgar qu'afayen la verdá.
Tamos naguando por esfrutar bien llueu d'esta nueva intromisión d'Asturies na ficción, nuna domina na que los nuesos paisaxes tan convirtiéndose en platós de dellos rodaxes como'l de la serie de Netflix Alma, o la película de Santiago Segura A todo tren: destino Asturias.
