Dende'l pasáu 7 de febreru Amosando arrexunta los cantares más aclamaos de la música asturiana.
Amosando repite los artistes de les sos anteriores ediciones. Naciendo en 2019 foi un ciclu de presentaciones de discos en formatu acústicu, tresmitíu por Internet por que llegue a un mayor públicu.
Como otros tantos espectáculos del sector, por cuenta de la crisis sanitaria tuvo qu'afaer el so formatu. Anguaño Amosando, a falta de la música en vivu, retresmite semanalmente pieces de cantares grabaes na edición pasada.
El programa va cuntar con más de 30 emisiones de los artistes más conocíos na escena asturiana y van tener llugar, cada. domingu a les 21.30h, tantu na canal de Facebook como nel formatu de Instagram TV.
Estes actuaciones van reflexar la calidá de la música asturiana y la so diversidá, yá que entemecen dellos estilos como l'indie, el folk y, por supuestu, la tonada.
Dende la organizadora de la iniciativa, musicasturiana.com, cunten con poder sacar alantre una edición esti 2021, gracies al balance positivu que tuvieron hasta agora coles más de 210.000 reproducciones de les ediciones pasaes que se vieron en más de 60 países.
