Güei conocemos la hestoria d'Ángel Muñiz Toca, un prestixosu violinista y director d'orquesta que nació n'Uviéu en 1903, morriendo nesta mesma ciudá en febreru de 1964.

Ángel empezó los sos estudios de violín nel conservatoriu uvieín, rematándolos gracies a una beca de la Diputación Provincial nel Conservatoriu de Madrid, onde llogró'l Premiu Sarasate. Con una pensión coló a estudiar a Colonia, onde s'espacializó en música de cámara y analís de les formes musicales para preseos d'arca y vientu. En Colonia dio diverses conferencies sobro la música española. Nel so regresu a Uviéu, foi nomáu profesor numerariu de violín nel Conservatorio, centru que dirixió dende 1952 hasta'l so fallecimientu, consiguiendo qu'aumentara'l so profesoráu con nueves disciplines instrumentales, y que se concediera'l grau cimeru a los estudios de pianu, amás de delles beques pa los alumnos más destacaos. Escribió un métodu de violín que tuvo gran ésitu. Nel terrén orquestal, foi director de la Orquesta Sinfónica Provincial d'Educación y Descansu dende 1943, y dio con esta agrupación más de 600 conciertos, arrenunciando a una carrera internacional de concertista de violín pola so dedicación a la dirección.

Foi convidáu a dirixir la Sinfónica y la Filarmónica de Madrid, amás de tar nel podiu d'importantes orquestes estranxeres, como la del Maggio Musicale Fiorentino. Nes sos xires como director visitó Italia y México. Na divulgación cultural, foi director de la Cátedra de Cultura Musical de la Universidá d’Uviéu, a la que llevó figures de relieve artísticu, nacionales y estranxeres. Al inaugurase la Sala Arriaga, pronunció una conferencia en dichu actu.

Pa llevar la música a tolos públicos, entamó conciertos en fábriques, mines, talleres y residencies de moces, y fundó una Orquesta infantil que dio dellos conciertos. El 24 de xineru de 1961 ingresó como miembru de númberu del Institutu d'Estudios Asturianos, col discursu Vida y obra de Eduardo Martínez Torner. Recibió numberosos homenaxes, y taba en posesión de diversos títulos y condecoraciones como reconocencia a los sos méritos.