Echando un güeyu a les característiques de les figures de los mascaritos de guirrios
y sidros como los de Valdesoto, en Siero, Asturies, ye posible albidrar coses en
común con festexos cíclicos d’otros llugares y dómines, como’l de Santa Bríxida, la
irlandesa Brigit, La Candelaria, o les Lupercales.

Guirrios de Valdesoto, 2011.

Les vestimentes de los guirrios o sidros de Valdesoto, son una pelleya d’oveya a
modu de cucuruchu de guedeyos, rematáu nun rau de raposu, con cinches de colorinos
colingando, y mascaritu, xeneralmente coloráu, igual que la faxa. LLeven esquiles ataes
a un cinchu pelos cadriles, botes y una vara o palu de más de dos metros nel que s’enconten pa
dar blincos. Xeneralmente, debaxo’l mazcaritu lleven ropa blanco como traxe, lo que tien
un simbolismu venceyáu a la pureza, los ciclos de purificación, etc. El fechu d’
andar pegando blincos, subise a les muries, o facer sonar les esquiles, tamién mos lleva pel
camín de l’asemeyanza coles cabres.

Los guirrios tuvieron presencia alredor del Nadal y Reis en conceyos
como Siero, Bimenes o LLangreo, polo menos, onde hubo guirrios propios y
comedies propies. Un detallín menos conocíu de los guirrios, ye que llevaben un cordón
azul, verde o coloráu que colingaba de la cintura como 50 cms, y rematáu nuna bolina de
maera, la garapiña, na que llevaben plantes aromátiques o rape, que daben a goler a les
moces.

Guirrios brincando en Silvero Cañada en 1970

Los guirrios asturianos de Valdesoto figuren al llau de les comedies, nes que
tamién apaecen personaxes como La Vieya, y otros que son parte de los aguilandos y
mascaritos ancestrales, polo que, depués de sieglos, dalgunos personaxes siguen
apaeciendo xuntos nun mesmu escenariu, nesti casu, con una estructura teatral mui
definía y cultivada, que se rexenera nos testos cada añu, pero que ye lo mesmo que
se representa coles figures d’otres mascaraes d’iviernu nes qu’apaecen La
Vieya, El Vieyu, los soldaos, el diañu, colos sos cuernos, el mélicu, l’afilaor, les dames,
los galanes, los tontos, la representación del partu del añu nuevu, cristianizao col
ñeñu Xesús, ceniceiros, les goxes, basoira, zamarrones, etc.

Pa contra’l Suroccidente astur, Degaña, Tinéu, Canga del Narcea, etc...,
apaecen les figures de los xamasqueiros, o frasqueiros, qu’amás de formar
compaña colos aguilandeiros, tamién tienen una función nes dances rituales de
palos, llindiando a los danzantes y pa que la xente nun estorbe al so pasu, lo que ye
una función mui asemeyada a los guirrios nes comedies. Dafechu, en dalgunos llaos, a
esti personaxe que llindia les dances conózse-y como Birria, que, como comenté más
arriba, ye un vocablu venceyáu etimolóxica y semánticamente al guirriu, y a les
oveyes/cabres. Los xamasqueiros, dando coles xamasques a la xente, puede
considerase un deséu de fertilidá, sobre tou cuándo-yos dan a les moces.

Guirria de Beleño, Ponga, Asturies