El Muséu de la Mina d'Arnáu cumple 10 años en 2023 y prepárase pa un añu de celebraciones. La primera d'elles va ser Viaxe al centru de la tierra, una cena de tipu cóctel cola que se va rindir homenaxe al xacimientu castrillonense, única mina submarina europea y primer mina de carbón n'España, amás de la primera qu'utilizó'l ferrocarril. L'eventu gastronómicu va rellatar el pasáu, presente y futuru d'Arnáu al traviés de 12 especialidaes culinaries inspiraes en parte n'otru menú históricu pal xacimientu: el que se sirvió con motivu del primer centenariu de la Real Compañía Asturiana de Mines, en 1953, según figura n'unu de los documentos donaos apocayá al conceyu por un familiar d'una de les persones que trabayaba naquel momentu na esplotación.

Pa esti propósitu va cuntar con trés prestixosos chefs asturianos: Isaac Loya, estremáu con una estrella Michelín nel Real Balneariu de Salinas; Marcos Cienfuegos, investigador culinariu y ceador de Bocamina, una esperiencia gastronómica na que yá entemecía los conceptos de cocina y patrimoniu mineru; y José Luis Camacho, especialista n'arroces y productos del mar y anguaño al frente del restorán Zascandil de Xixón.

El menú degustación del décimu aniversariu va sirvir nel Muséu de la Mina d'Arnáu el próximu 5 de mayu, vienres, nuna cena tipu cóctel pa 80 comensales. Ente les ellaboraciones que se van sirvir figuren una versión de la ensaladilla de llagosta que se probó en 1953 (nesta ocasión va ser de bugre). Como naquella ocasión, tamién va haber entremeses y empanada, y otra de les 12 creaciones va ser un chisgo al puru habanu col que s'agasayó a los asistentes a aquel ágape fai 70 años, qu'en Viaxe al centru de la Tierra va sirvir d'inspiración pa un postre. Too va tar ellaboráu con productos calidable y respetando el conceptu de kilómetru 0, con materia primo procedente de provisores locales y comarcales.

Les entraes p'asistir a la esperiencia gastronómica van poner a la vienta'l próximu martes a les 11 hores, a un preciu de 45 euros per comensal. La metá d'elles va tar disponible na taquilla del Muséu de la Mina d'Arnáu, mientres que la otra metá podrá adquirise de manera online al traviés la páxina web de Gustatio.