"Siento una gran influencia pol mio pueblu natal. Y ye que si Tapia nun t'inspira dalgo ye que nun tienes nada dientro", asina espresaba'l mozu Arturo la influencia que-y xeneró Asturies nos sos empiezos na moda.
Esti diseñador de 26 años financió los sos estudios na Escuela Superior de Moda y Diseño Goymar, en A Coruña, trabayando na hostelería del pueblu que-y vio crecer. En rematando los sos estudios de grau, realizó un Máster en San Martins, Londres, onde estudiaron tolos nomes reconocíos del sector y lo qu'impulsó la so carrera.
Dempués d'un tiempu trabayando pa la famosa marca «Lavin», decidió arriesgase y llanzar la so propia marca de moda en plenu confinamientu y recibió tal aclamación que 9 meses más tarde va presentar la so nueva colección, «Puro Teatro», na Semana de la Moda de París, de la mano de grandes conocíos como Dior o Yves Saint Laurent.
Nesta colección el tapiegu presenta una combinación de moda y vanguardia onde toles prendes masculines tán realizaes con telones de teatros que tuvieron que cerrar por cuenta de la situación sanitaria que se sufre nel mundu. Esta idea, según comentaba'l mesmu Obegero, parte de qu'esti tipu de cortines siempres se caltienen n'escena y tán presentes llevándose lo meyor y lo peor del públicu, teniendo les meyores vistes y viendo l'esfuerzu y el sacrificiu que s'escuende detrás del telón.
Como nun podía ser d'otra forma, a parte d'alma y guapura ,les prendes faen alusión a cómo se siente'l diseñador frente al andanciu «El llazu que t'ata les manes y te tapa la boca ye un símbolu de cómo me siento, paez que esta situación nun te permite movete nin falar.«, comentaba na última entrevista qu'ufiertó.
