Los Xuegos Olímpicos de París yá tán equí y son dellos los asturianos que van dir a intentar llograr una medaya olímpica. Les competiciones deportives, que se van disputar ente'l 26 de xunetu y el 11 d'agostu, van cuntar con munchos y munches de los meyores deportistes del mundu y, ente ellos, Asturies tamién ta representada al traviés d'estes persones:
Sara Ouzande y Saúl Craviotto, los asturianos del piragüismu
Ouzande, con delles medayes nel Mundial, va participar nos Xuegos xunto al so equipu de K-4 n'una disciplina que siempres suel traer a casa metales. Pela so parte, una de les lleendes del piragüismu mundial, Saúl Craviotto, qu'anque ye natural de Lleida, vive n'Asturies, va intentar repitir l'oru que yá consiguió en Pequín y Rio de Janeiro.
Pablo Carreño, el tenista que busca repitir medaya
El tenista xixonés, que yá sabe lo que ye consiguir una medaya nos Xuegos Olímpicos al llograr el bronce en Tokio 2020, va intentar consiguir nuevamente unu de los metales y traelo p'Asturies. L'asturianu cunta con delles victories en torneos ATP y la so trayectoria respuende pola so más que seria llucha poles medayes.
Bárbara Camblor ya Iñaki Canal, asturianos representantes n'asturianu
El xixonés Canal ganó la medaya de plata nel Campeonatu Mundial d'Atletismu en pista cubierta de 2022 y ye unu de los rivales a bater nestos Xuegos Olímpicos de París. Xunto al so equipu releveros de 4×400 metros, va intentar llograr l'oru na capital francesa. Pela so parte, l'atleta natural de Samartín del Rei Aurelio va intentar lo propio na mesma competición.
Laura Fuertes, a siguir faciendo hestoria nel boxéu
La xixonesa ganó una medaya de bronce nel Campeonatu Mundial de Boxéu Aficionáu Femenín de 2022, na categoría de 50 quilos. Darréu, nos Xuegos Europeos de Cracovia 2023, consiguió na mesma categoría una nueva medaya de bronce. Agora, va intentar llograr la gloria olímpica en París y siguir faciendo hestoria tres ser una de les primeres muyeres en representar a España.
3 asturianos na selección de fútbol
La selección femenina de fútbol va tener representantes asturianos nel banquín y nel campu. Per un sitiu, la seleccionadora Montse Tomé va liderar la espedición hacia l'oru olímpico tres alzase col Mundial. Con ella, l'ayerana Lucía García va ser pieza clave na delantrera de la selección. Na sección masculina, Diego López, natural de Turón y xugador de la Valencia CF, va dir a París so les ordes del seleccionador Santi Denia.
Abel Serdio, l'asturianu del balonmanu
L'avilesín, que milita nes files del Orlen Wisla Plock polacu, va dir cola selección de balonmano. El pivós yá consiguió una medaya de bronce nel Mundial de Balonmano y agora va buscar lo propio en París
Arbidel González, a pol oru en natación
Con namás 21 años, el corveranu va buscar la gloria y progresar na so carrera cola participación en París na disciplina de 200 metros mariposa.
Daniela Álvarez, estrella del vóley playa
Álvarez y la so compañera d'equipu, Tania Moreno, van buscar l'oru olímpicu en París. El talentu emerxente asturianu yá destacó en diversos torneos internacionales mesmo qu'en… ¡tenis! La xixonesa practicaba al mesmu tiempu dambes disciplines y destacaba nelles, anque finalmente decidióse pol vóley.
María López, pieza fundamental en hóquei yerba
La esperimentada xixonesa va liderar l'equipu de hóquei yerba en París, intentando ameyorar los resultaos collechaes enantes. Consiguió la 8ª plaza en Ríu de Janeiro y el 7º puestu nos xuegos de Tokio.
