Blanca Fernández ye graduada n’Estudios Clásicos y Románicos col Minor d’Asturianu. Anguaño trabajaya de profesora d’asturianu. Tamién ye escritora, sobre too de narrativa, y tien escrites yá dos noveles curties n’asturianu. A parte d’esto tamién collabora con Playpresta colos pogrames «Deprendi Asturianu» y «Cosplaypresta».
Un llugar pa perdese una fin de selmana…
Torazu ye pueblu perguapu, tranquilu y con un paisaxe difícil d’escaecer.
Un llugar pa vivir…
Si dalgo tien Bimenes ye bona xente y afayadizo, y si llegues nuevu vas
integrate rápido. Amás ta bien comunicao per carretera. Hai que barrer pa
casa.
Un platu…
Nun voi negar que me presta muncho comer, pero yo diría que’l pote ye de lo
mios favoritos.
Un postre…
Magar que duldo col arroz con lleche, voi decatame polos fayuelos.
Una playa pa pasar el día…
La mio playa favorita d’Asturies ye Rodiles. Llevo diendo dende neña y creo
que’l paisaxe que tien ye de los más prestosos. Eso sí, güeyu coles foles.
Un pueblín que nun podemos dexar de ver…
Puedo recomendar munchos, pero voi recomendar Tazones. Pues parar a mirar
caúna les cases, porque son toes distintes y perguapes, dafechu, hai una
decorada entera con conches pa la que pues tar mirando un bon cachu de tolos
detalles que tien.
Un chigre pa tomar unos culinos…
Pa min un de los más prestosos ye la Sidrería Plaza, en Nava, qu’amás ta al
llau del Ayuntamientu. Tamién se come perbién.
Un parque natural pa visitar…
Pa min ye, ensin dulda, el Parque Natural de Redes un de los sitios naturales
más guapos d’Asturies y bien prestosu pa dir de ruta caminando. Amás, tiene
un Centru de Recepción y Interpretación que te desplica un poco lo que ye’l
parque y tolo qu’hai ehí.
Una fiesta a la que nun faltar…
Tengo que dicir que será por fiestes equí n’Asturies a les que dir, pero si hai
una que me preste munchísimo ye’l Descensu Folclóricu del Nalón, magar que
dalguna vez me tiraran agua dende los balcones ensin yo pidila.
Un muséu pa recomendar…
Creo que la nuesa historia como emigrantes ye perimportante, y el Muséu de la
Emigración de Colombres y ye un muséu y archivu perinteresante que ye casi
obligatorio visitar.
Un momentu de la hestoria d’Asturies que te prestaría vivir…
Pues prestaríame vivir, dientro de que de xuru que bien nun lo diba pasar, les
guerres asturcántabres, y esa época en xeneral. Creo que ye un momentu
históricu que merez munchu más protagonismu.
Un baille pa pasalo bien…
Nun soi muncho de baillar, pero bono, la media vuelta ye un baille prestosu.
Una pallabra n’asturianu que te preste…
Una pallabra que me presta munchísimo ye “repunante”, amás ye que la
usamos tolos díes, ye tán de nueso.
Una tradición que nun pue perdese…
Si hai una tradición antigua que creo que nun se pue escaecer, son los sidros,
porque son un rastru d’una Asturies como quien diz pagana que bien de
tradiciones mitolóxiques perantigües y que tenemos suerte de tener tovía.
Una espresión n’asturianu que te preste…
Home, hai munches que me presten, pero hai una que s’usa muncho en
Bimenes que ye “Yes más tontu que’l que cebó’l pichón pol culu” que me presta
muncho.
