Dende la segunda metá del sieglu XX, Valdesoto celebra'l Desfile de Carroces, un eventu que marca'l zarru de les festividaes de San Félix. En 2023, esti desfile declaróse Fiesta d'Interés Turísticu. La tradición empezó cuando un grupu de vecinos decidió participar na fiesta con carros decoraos.
El desfile presenta carroces ellaboraes por delles peñes del pueblu. Estos grupos dediquen meses a trabayar en cada detalle pa crear carroces espectaculares y competir pol títulu de meyor carroza del desfile.
Una de les característiques más destacaes del Desfile de Carroces de Valdesoto son les actuaciones teatrales que se faen en cada carroza. A lo llargu del percorríu, les carroces faen paraes pa representar delles escenes qu'incluyen el folclor asturianu, la mitoloxía, la vida campesina, marinera y minera, mesmo que la picaresca y l'humor popular.
El desfile ye namás una parte de les celebraciones en Valdesoto. Cuando termina'l percorríu, la folixa sigue nel prau onde los asistentes esfruten d'una merienda-cena al estilu asturianu, acompañaos de música. Mientres la verbena ye'l momentu nel que'l xuráu uierta'l so veredictu sobre la meyor carroza del añu, reconociendo l'esfuerzu y la creatividá de los participantes.
L'añu pasáu la carroza ganadora foi la de La Peña Cotiellos cola so carroza "Xaréu Rural", una orixinal representación de los problemas a los qu'una familia urbana s'enfrenta nel mundu rural como un gallu que canta o la conexón WiFi.
Esti añu les fiestes de San Félix celébrense ente'l 9 y 12 d'agostu. El día grande va ser el 12, cuando se va poder esfrutar d'esti desfile, en qu'esti añu participen nueve carroces. Más tarde, va poder esfrutase de l'actuación de dos orquestes que van amenizar la fiesta.
