Cola llegada del Día de los Difuntos, los cementerios asturianos vuelven enllenase de persones que, nun día especial como esti, acompañen a los seres queríos que yá nun tán. Sicasí, n'Asturies cuntamos con cementerios bien guapos y que, más allá de feches concretes, son dignos de ser visitaos a lo llargo de tol añu.
Cementeriu de L.luarca
Si te gusten los cementerios guapos y con grandes vistes, el de L.luarca ye inmeyorable. Ta asitiáu en L’Atalaya, un saliente que s'alza sobre'l mar Cantábricu y que dexa al espectador un paisaxe espectacular. Nél conviven maxestosos panteones con modestes sepulturas, personaxes pernomaos con modestes persones. Toos con unes vistas dignes pal descansu eternu. Dalgunes de les persones que recibieron sepultura nesti cementeriu parroquial son el premiu nobel Severo Ochoa y la so esposa Carmen; Evaristo Casariego, escritor y periodista; l'Indianu Ramon García, fundador de la Favorita, tou un finxu comercial n'Arxentina; Vicente Trelles fundador de la Banca Trelles y unu de los creadores d'ALSA o Nene Losada, escritora y poeta.
Cementeriu de Banduxu
Nun paraxe singular y preciosu, el cementeriu de Banduxu guarda ente los sos murios una de les tradiciones más interesaes y coloridas qu'esiste nos cementerios asturianos. El pueblu medieval, qu'amás ta consideráu como Bien d’Interés Cultural, sotierra a los sos seres queríos en tierra, ensin rastru de llábanes. El 1 de payares, los vecinos celebren Tolos Santos cubriendo les tumbes con trabayaes cobertores florales. Asina, crean una escena bien guapa que se repite cada añu.
Cementeriu de La Carriona (Avilés)
El cementeriu Municipal de La Carriona ye un espaciu creáu a finales del sieglu XIX como zona funeraria pela rodiada d'Avilés. Ente les sos parés, amás d'allugar tanto a persones modestes como pernomaes, atesora interesaes y pervalibles escultures. Esto provocó que seya considerao como unu de los cementerios más guapos d'España. Na so visita, qu'encamentamos más allá d'en feches señalaes, destaquen sepulturas como les del Marqués de Teberga, Marcos del Torniello, Armando Palacio Valdés, o la marquesa de San Xuan de Nieva, ente otres munches que creen una composición funeraria única.
