Na sociedá actual, les persones consumidores cada vez amuesen más esmolición por conocer, con garantíes, la procedencia y les característiques de los productos agroalimentarios. El que los productos que consumimos na nuesa alimentación tengan un orixe sostenible adquier agora un altu valor pa les persones, polo que visibilizar la trazabilidá de los mesmos xenera enfotu. Coles mesmes, el mesmu productu lleva implícitu un valor cultural que ye patrimoniu inmaterial d'una comunidá rural.

Blockchain ye la tecnoloxía indicada pa dar soporte a esa necesidá de sofitar la trazabilidá de los productos agroalimentarios y la so principal característica ye asegurar la inmutabilidá de la información que se rexistró, esto ye, qu'un datu rexistráu por blockchain nunca pueda alterase dempués

Cinco elaboradores de Sidra d'Asturies, Castañón, Menéndez, Sidra Fran, Angelón y JR, apoyaos pol Conseyu Regulador de la Denominación d'Orixe Protexíu Sidra d'Asturies, collaborenn con CTIC Centro Tecnolóxicu na utilización de la tecnoloxía blockchain pa facer visible al consumidor la trazabilidá de la so Sidra de Denominación d'Orixe. L'aplicación blockchain, disponible en https://sidradop.ctic.es/ yá puede utilizase coles marques Valdeboides (Castañón), Valdornón (Menéndez) y Menéndez DOP Ecolóxica. Llueu va implementase nes marques Ramos del Valle (Sidra Fran), Angelón DOP y JR DOP.

Esta collaboración enmárcase na iniciativa L'Aldea 0, diseñu, ensayu y esperimentación d'un modelu socioeconómicu pa l'aldega del sieglu XXI , proyectu singular que surde de la collaboración públicu-privada ente'l Gobiernu del Principáu d'Asturies, representáu pol Comisionáu pal Retu Demográficu y pola Conseyería de Mediu Rural y Cohesión Territorial, y CTIC Centru Tecnolóxicu, al amparu del alcuerdu de la Conferencia Sectorial pal Retu Demográficu (Secretaría Xeneral de Retu Demográficu, Ministeriu pa la Transición Ecolóxica y Retu Demográficu), de fecha 29 de setiembre de 2021, pola que s'adopta'l marcu xeneral de cooperación pal impulsu y sofitu de proyectos singulares que dexen el tresformamientu territorial repercutiendo na reversión de la despoblación. Con delles llínees d'actuación nesti proyectu singular, la iniciativa d'aplicación de blockchain a la trazabilidá de la Sidra d'Asturies vien demostrar y validar l'impactu de les nueves tecnoloxíes dixitales nos modelos de negociu acomuñaos a actividaes desenvueltes o con orixe nel Mediu Rural.