Na capital asturiana tamos acostumaos a recibir tolos años al rei d'España. Pero poques vegaes tenemos la oportunidá de recibir un rei de los de verdá, de los que consiguen esi títulu por méritu propiu y non de forma hereditaria. En 1992, mientres les fiestes de San Mateo d'Uviéu, tuvo la oportunidá d'esfrutar d'un de los meyores showman de la hestoria del espectáculu: Michael Jackson.
Y ye que l'añu de les olimpiaes de Barcelona o de la Expo de Sevilla, n'Uviéu va quedar marcáu nos corazones de munchos uvieinos como l'añu que tuvieron la oportunidá d'esfrutar en directu d'un conciertu del mesmu rei del pop. El tour Dangerous, que paró en delles de les ciudaes más importantes del mundu, foi un de los espectáculos qu'entró dientro de l'axenda cultural qu'ufiertó'l conceyu d'Uviéu pa les fiestes de San Mateo del añu 1992. El conciertu tuvo llugar nel estadiu Tartiere de la capital.
El tour, que promocionaba'l discu del mesmu nome, abría, al igual que l'álbum, col cantar “Jam”, en teniendo a Michael paráu en silenciu frente a los espectadores mientres unos minutos. Tamién incluyó dellos cantares d'este mesmu álbum como “Heal the World” o “Will you be there”, que s'incluyó na BSO de la película Free Willy.
Pero ensin dulda el momentu sorpresa del conciertu foi al interpretar el cantar “Black or White”, nel qu'apaeció ensin previu avisu nada menos que Slash, el guitarrista de los Guns and Roses. Mientres el cantar, Slash, col so inconfundible vestuariu, pudo facer rumbu de la so habilidá cola guitarra nel clásicu punteu de “Black or White”. Un momentu épicu que queda pa la hestoria.
Por supuestu, nun faltaron dalgunos de los cantares más clásicos del cantante como “Billie Jean”, “Smooth Criminal” o'l míticu “Thriller”, que cantó col so coregrafía habitual arrodiáu de zombies, como nun podía ser d'otra manera.
A la fin del tour, col cantar de “The Man in the Mirror” de fondu, Michael colgó un cohete al llombu, abandonando asina'l Tartiere y Uviéu. Una nueche que Asturies nun va escaecer enxamás.
