David Fernández González (Pravia, 1985), un día quiso dedicáse a la Hestoria pero acabó en too menos no que tenía qu’acabar. Ye activu na recuperación de la Memoria Histórica y nel movimientu de reivindicación llingüística. Charrán a tiempu completu ye una de les voces y cabeces tres del programa Sentir Asturies qu’emite la radio pública d’Asturies (RPA).

Un llugar pa perdese una fin de selmana… L’occidente costa pa mí ye lo más guapo pa escapar cualquier fin de selmana. Valdés, Navia, A Veiga, Castripol… ye un aciertu.

Un llugar pa vivir… Con toles sos carencies, que nun son poques, Pravia. Guapu, tranquilu, rellativamente bien comunicáu con tren coles tres grandes ciudaes y a un tiru piedra la mar y el monte. Tien les sos deficiencies como tola Asturies rural y más nesta zona que ye una especie de zona gris que nun se sabe bien si ye centru o ye occidente y paez que siempre queda escaecía.

Un platu… Igual suena un poco pacón pero yo soi del equipu fabada. Dame igual que teamos en xineru que n’agostu. Ye verdá que vengo d’un sitiu que ye superpotencia plantando fabes, qu’igual tien que ver. 

Un postre… Les bollines, les grandes desconocíes tapecíes pola dictadura de la casadiella. Y tamién la enfilada que se fai pa la zona d’occidente costa ye pa echase a tremar. 

Una playa pa pasar el día… Si ye por señaldá de la infancia diría que’l pedreru d’El Garruncho, en San Esteban, que yera a la que díbemos de nenos. Por gusto préstame cualquiera qu’evite lo masificáu d’Aguilar. Por exemplu Las Llanas, que nun sé si encamentala porque siempres foi un poco paraísu del branu polo poco visitada y por tener un accesu un poco complicáu.

Un pueblín que nun podemos dexar de ver… San Esteban, nel conceyu Muros. Ye’l pueblu de la mio familia y nel que guardo los meyores recuerdos de la mio infancia y mocedá. Un pueblu que non solo ye guapu, ye que guarda gran parte de la historia d’Asturies de los sieglos XIX y XX ellí. El conxuntu de patrimoniu industrial del puertu bien paga una visita.

Un chigre pa tomar unos culinos… Voi recomendar dos. En Pravia «Casa Vila», que ye chigre-tienda y cómese d’escándalu. Y en San Esteban, ya que váis dir visitálu pol conseyu anterior, Tasca El Puerto, que ye’l chigre de la mio familia y aparte de comése mui bien, pa cualquier persona que-y preste la mar va alcontrar un muséu ellí de tolo que’l mio tíu Fran foi recopilando durante munchos años tres de posar de navegar.

Un parque natural pa visitar… Somiedu. Va poco fice la ruta dende la Farrapona al Val.le del L.lagu y quedé ablucáu. Guapísimu, otra ayalga natural d’Asturies pa la que paga la pena echar el día.

Una fiesta a la que nun faltar… Home, la más grande pa mi ye’l Xiringüelu, onde va parar. Llueu les fiestes de Somáu, San Xuan en L’Arena y les fiestes del Carmen en San Esteban. Pero téngolo pasáu mui bien en Santana Montarés en Cuideiru o na xira de Navia. Agora que pienso la verdá que pa fiestes yo soi mui pésicu, nun cruzamos muncho más p’allá del Nalón…

Un muséu pa recomendar… Igual ye mui tópicu pero creo que tol pueblu asturianu tien de tar arguyosu de lo que tenemos nel Belles Artes d’Asturies. Ye una ayalga de la que presumir y cola que disfrutar siempre que se pueda. 

Un momentu de la hestoria d’Asturies que te prestaría vivir… Nun digo la oficialidá porque eso voi vivílo que va llegar en nada. Si falamos d’un fechu hestóricu prestaríame vivir el 25 de mayu de 1808, pol finxo hestóricu que foi y porque siento que ye ún de los grandes momentos nos qu’Asturies faló con voz propia.

Un baille pa pasalo bien… Meca, yo nun soi de baillar, fáltame dalgún músculu o algo. Si ye pa ver y asina faigo una concesión al oriente que paez que-y tengo zuna, el pericote ye bien prestoso.

Una pallabra n’asturianu que te preste… Caricós, pola pallabra y polo qu’evoca.

Una tradición que nun pue perdese… Les fiestes populares. Qu’esti andanciu nun seya quien a sepultales con tol trabayu que lleven d’asociaciones de vecinos y pueblos.

Una espresión n’asturianu que te preste… Cuando quixi nun quixisti y agora que quies, nun quiero.