Enantes de que los astures dieran nome a la nuesa tierra, dicen les lleendes qu'ésta taba poblada por unos misteriosos seres de dimensiones xigantesques llamaos "mouros", anque pol so calter fuxidizu y rudu sábese perpoco d'ellos. De la so esistencia namái nos queda'l testimoniu de dellos megalitos repartíos per toa Asturies, dando creitu a estrañes faladuríes que recuerden la fortaleza sobrenatural d'estes criatures. Nesti sen, ye como s'afirma que pol so estraordinariu vigor nun-yos costaba un res tresportar grandes piedres d'un monte a otru pa edificar estes enigmátiques construcciones na que la so finalidá tovía ye un secretu. La imaxinación popular axudicó a los dólmenes la función máxica de grandes fornos onde cocíen l'oru, envizcando a munches persones a restolar embaxo la so tierra les ayalgues fabuloses ellí sapozaes. Nel de Pradias, precisamente, dizse que foi una moura la que puxó cola tiesta pela piedra cobertoria, marcando col calcañu los cazoletos que s'observen na superficie.


Los "mouros" esaparecieron de la superficie de la tierra por razones desconocíes, magar que se supón que coincidió cola espansión del cristianismu. Fueron obligaos a vivir nel so interior onde se sabe que se dediquen a la minería, la metalurxa o, simplemente, a xugar a los bolos. Rara vez salen per cueves y dólmenes pa recoyer comida. Dicen que namái lo faen al atapecer o en plena escuridá y en díes mui señalaos, como la máxica nueche de San Xuan.