Nos últimos díes tuvimos viendo en dellos medios de comunicación la montonera de xente especializao n’aves que s’averó al Cabu Peñes por mor de l’apaición d’unes curuxes nivales orixinaries de Canadá. Delles persones llegaron a viaxar mientres hores namás pa ver esta rareza de la naturaleza qu’asocedió n’Asturies y que calificaben de llocura. Pero si nun sabes de qué ave tamos falando, nun t’esmolezas, vamos esplicate por qué ye tan ablucante la presencia d’esti ave na tierra de nueso.
La curuxa nival ye un ave qu’habita la tundra d’Asia, Norteamérica y Europa, pero non solo eso, ye l’ave oficial de la provincia canadiense y francófona de Quebec. Les característiques d’esti animal son unos güeyos doraos y un picu prietu y con una envergadura que puede llegar a los 150 centímetros. Esti últimu datu fai que seya una de les especies más grandes de curuxes, y n’América del Norte, ye la especie más pesada. Sicasí, lo más característicu d’esta ave ye’l so plumaxe blanco y que-y sirve de camuflaxe pal ambiente nel que vive, pronto del Círculu Polar Árticu. Amás esta curuxa nun ye nocherniega como les d’Asturies, sinón, que tien la so actividá dende l’alborecer hasta l’anochecer.
Agora, dempues d’esta esplicación curtia, de xuru que vas principiar a entender a tola montonera de xente que s’averó al Cabu Peñes... y quién sabe, quicías si asocede otra vegada más, tu seyas una d’ellas.
