El Conseyu Regulador de la DOP Sidra d'Asturies presentó esti vienres 2 d'avientu, nel Hotel Môderne de Xixón, l'actividá gastronómica ‘Asturies Sidra Brut 2022’ y l'entamu de la campaña de Navidá Sidra Natural Esplumosa. Una presentación llevada a cabu pol presidente de la entidá, Guillermo Guisasola; la directora xeneral de Desenvolvimientu Rural y Agroalimentación, Begoña López; y el director creativu de Arrontes y Barrera, Luis Arrontes.

“Ye un productu tan nuesu como lo ye la sidra d'echar. Ye una bébora natural y d'una alta calidá, reconocida por munchos sumilleres internacionales, y que desgraciadamente nun tien la reconocencia que se merez. D'ehí que cada añu impulsemos esta campaña”, manifestó'l presidente del Conseyu Regulador de la DOP, Guillermo Guisasola.

“Ye una sidra sostenible, de kilómetru cero, pero que precisamos conocela más na nuesa rexón. Marida perbién con munchos productos gastronómicos. N'Asturies tenemos de sacar pechu d'esta bébora”, espresó la directora xeneral de Desenvolvimientu Rural y Agroalimentación, Begoña López. Hasta'l 6 de xineru podrá tastiase, a precios bien económicos, en 150 establecimientos de la nuesa rexón, les sidres esplumoses amparaes dientro de la Denominación d'Orixe Protexida Sidra d'Asturies.

Les sidres participantes d'esta edición son: El Gaiteru Etiqueta Negra, Pomarina y Valle Ballina y Fernández (El Gaiteru), Emilio Martínez (El Gobernador), Poma Áurea (Trabanco), Prau Monga (Vilba de Angelón), Ramos del Valle (Fran) y Solaya (Quelo). Amás, va haber un refuerzu na canal Alimentación con delles degustaciones nes principales grandes superficies asturianes y tiendes gourmet.