El Conseyu Regulador DOP Sidra d'Asturies presentó, el pasáu 11 de mayu, la so primer canal de vienta dixital: ‘Tienda Online: Sidra d'Asturies DOP’. Esti proyectu naz col propósitu d'ayudar a tolos llagares de la DOP nel procesu de digitalización y facilita-yos una canal de vienta alternativu al tradicional, motiváu pola baxada de l'actividá hostelera.

‘Tienda Online: Sidra d'Asturies DOP’ ye un marketpalce (portal de vienta online) venceyáu a la web https://sidradeasturias.es/, nel que van poder tar presentes tolos ellaboradores de sidra DOP qu'asina lo decidan pa comercializar cualquier productu certificáu col sellu de la DOP. A día de güei, yá hai quince llagares xuntaos al proyectu, de los cualos cinco d'ellos yá tien operativa la so tienda.  

Pa la xestión d'esti proyectu, la DOP pon a disposición de los llagares que se acomuñen, amás del desenvolvimientu del portal que'l so costu ye asumíu al 100% pol Conseyu Regulador, tol tráficu de visites que reciba la web. Cada llagar xuntáu dispón d'una tienda independiente na que va vender los sos productos certificaos. Otramiente, va poder afitar los precios de los sos productos, el sistema y les tarifes de les unviaes, y los métodos de pagu, en que la so configuración y validación poles entidaes va emprestáse-yos ayuda. 

Una vegada puesta en marcha la tienda, la DOP va sofitar el so espardimientu con una campaña en buscadores (Google, principalmente) na que va amosar a los usuarios que realicen busques acomuñaes a “sidra d'Asturies”, anuncios programáticos para xenerar un mayor tráficu de visites.

“Tratase d'una plataforma bien senciella d'usar, con independencia del dispositivu que s'utilice”, apuntó Pablo Llanos, director de proyectos de Bittia, empresa encargada del desenvolvimientu de la plataforma. Enagora, namás ta habilitáu la compra en Península y Baleares.

Pela so parte, el llagareru Francisco Martínez Sopeña, xerente d'El Gobernador, fixo fincapié en “la unión del sector” pa que'l proyectu saliera adelantre. “Ye xuna manera d'alzar la voz y poder promocionar conjuntamente tolos productos DOP. Ye una gran noticia que la Sidra d'Asturies vaya sumase al comerciu electrónicu, tamos bien estimosos”, comentó. 

 “Pal sector ye una gran noticia. Dalgunos de los llagares inscritos nun teníen vienta online, y esto va suponer, amás d'un pasu importante hacia la digitalización, una medría na so facturación”, dixo Daniel Ruiz, xerente del Conseyu Regulador. 

Per otru llau, Ruiz aprovechó la so intervención pa estimar a Otea les xestiones na negociación cola alministración pa l'apertura d'horarios y la progresiva eliminación de restricciones na hostelería. “Ye un primer pasu, esperemos que llueu, pol bien del sector sidreru, pueda permitiseel consumu en barra”, defendió.