Astru del fútbol asturiano y español n'una dómina na que les estrelles, a pesar de ser más pequenes que les d’anguaño, rellumaben y palpitaban más nos corazones de l'afición, Enrique Castro ‘Quini’ foi lliberáu de los sos secuestradores un 25 de marzu de 1981, casi un mes dempués de qu'estos-y arrampuñaren la llibertá. Foi l'unu de marzu, dempués del partíu qu'enfrentó al Barcelona, l'equipu onde xugaba l'asturianu, col Hércules, con victoria pa los culés (6-0) y especial ciñu de Quini, que marcó dos tantos. A la salida, dos homes armaos asaltaron el Ford Granada nel que diba Quini, obligándo-y a xubir a otru coche y empecipiándose, asina, una llarga retención metanes la cual España pensó nun posible desenllaz fatal.

Tamién Enrique Castro, que va reconocer col tiempu que, al oyer los ruios de quien finalmente resultaron ser axentes que trabayaben pola so lliberación, autoconvenciérase de que los sos captores diben matalu. Namás lloñe de les intenciones de los dos mecánicos qu’, ayudaos d'un terceru, secuestraron y zarraron nel taller onde trabayaben fai agora cuarenta años a Castro. Apuraos poles deldes, pretendieron llograr réditu económicu de la captura de quien diben reconocer, col pasu de los años, como una bona persona. Quini llegó a perdona-yos la falta nel xuiciu posterior, refugando los cinco millones de pesetes que la Xusticia impuso sobro los sos secuestradores como pagu pa los daños y perxuicios, que fueron munchos, pal xugador.

Los secuestradores de Quini pidieron cien millones de pesetes pa lliberar al xugador, que pasó los díes de la so captura nun minúsculu zulu fechu con prieses nel taller del 13 de Jerónimo Vincens y alimentáu en base a bocadiellos. Pero la bola fíxose-yos demasiao grande: nun yeren profesionales nesto de la criminalidad. Medrosos de ser prindaos, negáronse recurrentemente a recoyer el preciu axustáu na cai; les llamaes, feches dende cabines telefóniques públiques de Barcelona, fueron pinchaes pola policía, pero entá asina tuvieron ciertu tiempu de marxe -y de congoxa pa familia y siguidores de Castro-.

La odisea acabó al ser deteníu l'interlocutor de el secuestradores nel aeropuertu de Xinebra, a onde viaxara p'abrir una cuenta onde'l club culé aseguráralos qu'efectuaría la tresferencia millonaria. Esi día desmontóse la trama, el zulu de Jerónimo Vincens quedó vacíu, como siempres debió tar, y Quini recuperó la llibertá. Güei, a cuarenta años del tingláu, les imaxes d'aquel día formen parte, y de qué manera, de la nuesa hestoria gráfica recién. ¡Y menos mal que la cosa salió bien!