La máxima representación del gótico en Asturies ye la Catedral d’Uviéu, que ye amás el nuesu monumentu más grande. La repercusión d'esti estilu arquitectónicu ye enforma menor equí que la del románicu. Avilés y Llanes son, cola capital Uviéu, los conceyos nos qu'atopamos más representaciones gótiques.

La catedral d’Uviéu foi formando dende los sieglos IX al XVII una redolada monumental que contien los más diversos estilos arquitectónicos. La so construcción empecipiase cola catedral altomedieval, les dependencies episcopales, qu'integraben la Cámara Santa, y la basílica de La nuesa Señora del rei Castu. Dempués llegó la renovación gótica a finales del sieglu XIII cola construcción de la Sala Capitular. La mayor parte de la obra, sicasí, va realizase mientres el sieglu XV, en plenu góticu flamíxeru, incorportando la lluz al traviés de les sos vidreres, como elementu diferenciador d'esti períodu. De la mesma dómina son la mayor parte de les capiyes adosaes a la nave gótica. El claustru presenta ensame d'estilos, lo cual esplícase pola llarga duración de les obres (más de cientu cincuenta años). Nel so interior sobresal el pimpanu retablu mayor fecháu a empiezos del sieglu XVI. La falta de medios económicos obligó a construyir una única torre, de los dos proxectaes, concluyida nel añu 1551 y reconstruyida nuevamente en 1575 dempués de la so destrucción producida por un rayu. A finales del sieglu XVIII termina la espansión de la redolada monumental de la catedral asturiana y presenta yá l'aspeutu actual.

Dientro d’Uviéu tamién s'atopa, representante d'esti estilu arquitectónicu, la ilesia de Santu Domingo, construyida a principios del sieglu XVI, polo que ye un bon exemplu del góticu tardíu.

Cuando l'estilu góticu llegó a Asturies, según reflexen los escritos de la dómina, solamente esistíen dos núcleos que pudieren tener la considerancia de ciudaes medievales: Uviéu y Avilés. Esti postreru tenía un comerciu prósperu gracies a el so puertu marítimu y conserva por esta razón apreciables monumentos góticos como la capiya de les Nales, alcontrada na ilesia de San Nicolás, na cai de La Ferrería. Esta capiya se contruyó nel sieglu XIV para mausoléu d'una familia aristocrática y barganal d'ella atopa la capiya de Los Ánxeles, de construcción posterior.

Tamién esisten dellos castiellos d'esti estilu como'l castiellu-palaciu Maldonado en Tinéu o'l castiellu de Priorio.