Nel xéneru Ophrys inclúyense aquellos plantes que les sos flores asonsañen en color, forma o inclusive golor, a les femes de diversos insectos, xeneralmente abeyes solitaries. Esti xéneru pertenez a la familia de les Orquidáceas, popularmente conocíes como orquídees, que al contrariu de lo que muncha xente piensa viven dende l'Ecuador hasta los círculos polares Artico y Antárticu. Cuando los machos de les abeyes atopen una d'estes flores, munches vegaes atraíos pol so golor, creen tar en presencia d'una fema de la so especie y traten d'apariase con ella. Gracies a la presión que produz el cuerpu del insectu sobro la flor mientres la falsa cópula, remanar un mecanismu pol cola la planta vacida sobro l'insectu los sos sacos polínicos. L'abeya, trescalada de polen, va salir en busca d'una nueva pareya y nel casu de qu'esta sía otra flor de la mesma especie va producise la polinización. En munches especies tropicales d'estes Orquídees la imitación apuerta a tan perfecta que la so reproducción va depender puramente d'una única especie d'abeya.
N'Asturies tenemos cuatro representantes del xéneru Ophrys, toes elles bien rares na naturaleza, anque pola so singularidá ye frecuente atopales como plantes ornamentales en xardinos. La más conocida ye la yerba de l'abeya, Ophrys apifera, que caltien una importante población nes dunes de la sablera de Rodiles, anqune tamién la atopa n'otres zones. Les mosques, Ophrys sphegoides y Ophrys scolopax, que tamién prefieren los terrenes caliares de monte.
