La seronda ye davezu el tiempo de facer sidra, nel que pañamos y mayamos les mazanes. Mayar la mazana ye una costume mui representativa d’Asturies y que ta nidio que llevala a cabo correctamente ye fundamental pa una bona sidra.
Pa entamar, ye importante seleccionar les mazanes que pueden usase pa facer la sidra. Nel casu de la sidra DOP d’Asturies falamos de cuasi unes 2000 variedaes de mazanes, ente les que tán mazanes como la amariega, la blanquina, la carrió o la verdosa. Les mazanes métese nos “ochaos” (unos paxos que lleven unos cuarenta kilos), pa saber con cuántu frutu va poder contase. Dempués, esisten dos formes de mayar.
La forma tradicional, cuasi n’estinción, nel que se echen les mazanes nun duernu (una especie d’escudiella onde se mayen les mazanes). Mayar una mazana nun ye una xera fácil, y d’antiguo solía facese n’andecha, y por xente con brazos fuertes y bien preparaos pa ello. El so trabayu consistía en golpear les mazanes con muncha fuercia, rapidez y en sincronía col restu de xente pa impedir que la mazana escape pelos llaos. Esto facíenlo con un “mayu”, un mazu de madera de mangu llargu y cabeza ancha qu’estrapalla la mazana. Dempués, échase al llagar y pa que se lleve meyor, subíense enriba d’ello, pisándolo con unes madreñes nueves y mui llimpies.
Sicasí, anguaño pa mayar úsase una máquina que se llama “mayadora”, un aparatu ellétricu esencial nos llagares que s’encarga d’aforrar esti costosu trabayu, machacando bien rápido toles mazanes, pa sacar d’elles la meyor sidra posible. La manera de mayáu tradicional queda en pocos llugares o n'eventos nos que se trata d'enseñar a los interesaos cómo se trabaya la mazana antiguamente.
