El mazo de Meredo ye un conxuntu etnográficu situáu nel conceyu d’A Veiga, agora dientro d’un área recreativa, pero que mientres munchos años funcionó como ferrería gracies al usu del agua del ríu Suaron como fonte d’enerxía. L’orixe d’esti llugar nun ye seguru, pero sí que sabemos qu’esiste polo menos dende’l sieglu XVIII. Amás, la llocalización d’esti mazo débese a la tradición metalúrxica qu’hai nesta zona d’Asturies, cola conociencia de qu’alredor d’esti llugar hebo dellos mazos más, como’l de Molexón o Sela de Loura, ente otros.

La ruta, d’unos 10 kilómetros, arranca nel pueblu de Piantón, antaño capital del conceyu hasta’l sieglu XIX y onde podemos alcontranos cola so ilesia, del sieglu XVI. Dende ehí, tomamos el camín que va p’Arcilo tres pasar el Puente Romanu, caminando ente una viesca de delles especies. En llegando a esti pueblu, vamos tomar el camín que nos lleva a Cobre pa dempués desvianos per un camín que va pa El Foxo y que nos va llevar hasta’l propiu Mazo de Meredo, onde esfrutar d’un paisaxe preindustrial únicu, cola cascada del Suarón y la propia ferrería. Depués d’esta parada nel camín, la ruta torna p’Arcilo per otru camín, bordeando’l ríu Suaron y onde vamos poder ver la casona de Sestelo, ún de los edificios más impresionantes que podemos ver nel suroccidente asturianu. Dende Arcilo, va tomase’l mesmu camín pol que se vino, onde podremos ver una vista xeneral del valle, con tierres de llabor, praos y repoblaciones, pa llegar de nueves a Piantón, onde se remata tamién esta perguapa ruta.