El Muséu Etnográficu del Oriente va acoyer dellos talleres pa conmemorar esta efeméride que se celebra de forma simultánea en casi una ventena de países europeos coles mires d'averar al públicu'l mundu artesanu, los secretos de los sos oficios y espublizar la so riqueza, diversidá y singularidá.
La cita ta organizada pola Asociación Mercado Artesano y Ecológico a través de Esencia Artesana, un eventu de calter festivu y divulgativu qu'algama anguaño la so cuarta edición y que busca promover y averar l'Artesanía d'Asturies, convidando al públicu a celebrar la gran fiesta europea que va tener como escenarios delles localidaes d'Asturies: Xixón, Avilés, Uviéu, Lluancu, Mieres o Porrúa, ente otres.
En concreto, nel casu de Porrúa, el sábadu 2 d'abril, de 10:00 a 14:00h van tener llugar un taller de cestería al cargu de José Ramón Vázquez pa afayar y aprender técniques que dexen la realización d'una pieza de cestería y un taller de telar manual al cargu de Belén Vega con telar de cintura que dexa iguar distintos texíos, cintes simples de dellos colores, cintes de pelo, lligues tradicionales, etc.”. Toles actividaes son DE BALDRE y van facilitase los materiales necesarios para'l so desenvolvimientu. Les places son llimitaes, polo que se imprescindible formalizar la inscripción al traviés del email info@noriente.com o llamando al 985 402 547 de martes a sábadu de 11:00 a 14:00.
