La crisis sanitaria provocada pola Covid-19 obliga a retrasar la celebración n'Asturies del certame de quesos más prestixosu del mundu
Uviéu va tener qu'esperar. El comité organizador de los World Cheese Awards, el certame de quesos más prestixosu del mundu, decidió aplazar la so celebración hasta 2021. Taba previsto que'l certame se celebrara na capital asturiana los díes 4, 5, 6 y 7 de payares. Finalmente, nun va ser posible anguaño por cuenta de la actual crisis sanitaria provocada pola Covid-19. La cita queda d'esta manera pospuesta hasta l'añu que vien y va tener llugar del 3 al 6 de payares de 2021.
“Tres delles xuntes analizando los pros y contras, lleguemos a la conclusión de que ye meyor atrasar l'eventu un añu y poder desenvolvelu como lu planiemos. Ye importante cumplir los oxetivos marcaos. La otra opción yera entamar un Festival con munches restricciones. Pero por responsabilidá y, sobremanera, la ilusión que xeneró tanto n'Uviéu como en toa Asturies, decantemos por allargar la candidatura hasta payares del 2021”, señaló'l Comité de Dirección.
"La torna económica y de marca Asturies que va traer consigo'l Festival ye una oportunidá que nun podemos dexar escapar”
Asturies va cuntar asina con un añu enteru pa lliderar l'allugamientu de los quesos asturianos ya internacionales nel mundu. “La torna económica y de marca Asturies que va traer consigo'l Festival supón una inyección económica perimportante pa la ciudá y el territoriu, una oportunidá que nun podemos dexar escapar, sobremanera dempués de la crisis causada pola COVID-19” declararon fontes del Comité de Dirección.
En dando a conocer la decisión d'atrasar el Festival, el Comité de Dirección adelantró que se ta trabayando nun calendariu d'actividaes col enfotu d'asitiar a Uviéu y Asturies como capital del quesu. D'esta manera quier contribuyise a la recuperación económica del sector agroalimentariu. “Llevamos trabayando más d'un añu nel allugamientu de Asturies, y Uviéu como ciudá d'acoyida del certame y nun queremos que toles xestiones realizaes hasta la fecha seyan en balde. Queremos caltener vivu'l Festival y cuntamos con una batería d'acciones que vamos comunicar nos meses vinientes”.
Focu d'atracción
Los World Cheese Awards van cumplir 33 ediciones n'Uviéu. Nesti concursu participen más de 3.000 quesos de los cinco continentes. 250 xueces internacionales encargase de dictaminar cuálos son los meyores productos del mundu. Espérase que más de 10.000 persones asistan al eventu. El certame inclúi tamién una exhibición de productos. Va atraer a Asturies a críticos y prensa gastronómica, compradores y distribuidores, que van tener la oportunidá de rellacionase de manera directa colos productores y conocer los caberos enclinos de gastronomía y quesu.
Los quesos son unu de los principales atractivos de la gastronomía asturiana. Bastante ye que, la comunidá ye conocida como ‘el país de los cuarenta quesos’, en referencia a la gran variedá de productos qu'ufierta. La intención del Gobiernu asturianu ye dar continuidá a esta cita nel futuru cola celebración d'un eventu añal dedicáu a esti productu.
