Puede esfrutase de munches coses nesta vida, inclusive cola que ta cayendo. Podemos esfrutar de la compañía de los nuesos, d'un bon llibru, d'una bona película, d'una bon cantar… pero lo que más nos gusta,  ye esfrutar d'una bona comida casera, d'eses de zucase los deos. En La Felguera, en plenu corazón de la cuenca minera, atopamos El yantar d’aldea, un restorán de comida tradicional casera, especializáu en carnes roxas, pexes y ensalaes templaes que nos dexa esfrutar de los sos platos dende'l calor del nuesu llar.

            En El yantar d’aldea, tienen delles opciones de picotio pa abrir boca: quesos, embutíos, ensalaes, patates braves… Pero de xuru nun vas querer quedate namás ehí, porque tamién ufierten una variedá de revueltos de setes  y dellos platos de cuyar (como fabada, garbanzos con bacaláu o langostinos y pote asturianu) qu'en  estes feches tan fríes, sienten tan bien.

            Por supuesto,  en El yantar d’aldea nun falten ufiertes cárniques. De los sos fogones salen deliciosos platos como costielles al fornu, escalopines de solomillo al gustu, entrecot de güe al Cabrales y dellos tipos de cachopu (de xata; de xata con cogordes monteses; ibéricu, quesu provolone y piquillo o de cecina, quesu de cabra y piquillo), eso por señalar namás que dalgunos de los sos platos más llamativos. Cada selmana ufiértennos una suxerencia en carnes, asina que convien tar soyertes a les sos redes.

            Anque ensin dulda,  lo más llamativo de la so carta, son les sos munches especialidaes. Por mentar dalgunes, podemos atopar: tostas de picadiellu caseru y crema de quesu de cabra; pitu de caleya guisáu con patatinos al arume de Moet-Chandon; cachopines de cogordes con piquillo y crema de quesos o la cazuela “El Yantar” (que contien cogordes, gambes, amasueles y gula)… y una llarga llista de platos que te faen la boca enagua.

            Una estensa y apetecedora carta que se remata con delles elecciones de pexes y mariscu, variedaes de paelles, arroces y parriladas que pueden realizase por encargu.

            Y pa quién-yos cueste decidise con tanta comida rica para escoyer, podemos optar directamente por un menú del día que contien primero, segundu, terceru y un postre a escoyer por tan solo 10€. Podemos consultar la so carta y menús en esti enllaz.Pa realizar el pedíu, pudes llamar al 625 76 49 42 o al 984 18 66 46. Puedes dir recoyelo nel so local o que te lo lleven a casa. En El yantar d’aldea pónentelo fácil, lo más difícil, va ser escoyer.