Que la sidra ye la bebida insinia d’Asturies, ye una d’eses coses nes que tol mundu ta d’alcuerdu y sobre la que nun hai nenguna discusión. Tanto ye asina que ye’l símbolu inconfundible de la nuesa cultura gastronómica. La sidra ye una bebida que representa, por sí mesma, la sociedá asturiana a la perfección, yá que munches vegaes ye sinónimu de folixa (enxamás falta nes nueses fiestes), sociabilidá (¿hai bebida más social que la sidra? Una bebida que, por costume, va de mano en mano) y conexón colos nuesos oríxenes. Cualidaes que comparte tamién dafechu con una de les villes más visitaes d’Asturies: la guapa Ribeseya. Por eso, esa conexón ente sidra y Ribeseya ye inevitable, y lleva siendo evidente nos seis años que lleva celebrándose na villa marinera la Fiesta la Sidre.

Una fecha marcada n’encarnao nel calendariu pa los más aficionaos a la sidra, y una cita ineludible tolos años (sacante los dos años de “parón” pol andanciu) y que cuenta siempres colo más destacable de la nuesa bebida por antonomasia. Por destacar dalgunes de los sos últimes fazañes, na so edición de 2019 llegaron a ser noticia en dellos medios estatales, yá que na so clausura estimóse que s’escanciaren alredor de 3000 botelles de sidra (unos 2000 llitros).

Una de les coses que más consiguió potenciar la Folixa la Sidre de Ribeseya ye'l concursu oficial de sidre casero, nel que participa xente de tolos conceyos d’Asturies. Ún de los más esperaos mientres tol añu por xente y llagares de tola nuesa tierra. Nesti concursu, los llagares participantes (el concursu suel contar cola participación de dalgunes de les marques más prestixoses de la sidra casero natural) presenten el líquidu a concursu, que va ser xulgáu por dellos espertos y espertes de sidra, dándo-yos una puntuación a tolos elementos importantes que vayan componer la sidra. El concursu suel dase en delles fases (primer ronda, de la que pasen seis “palos”, semifinal, con un nuevu corte de seis y la final como gran pieslle pa la folixa) na plaza’l Mercáu. Davezu la llucha pol primer puestu ta mui reñida, resolviéndose dalgún añu por mediu de desempates o diferencies de malapenes un puntu. ¿Repetiráse esa emoción esti añu? Pero claro, nun hai sidra ensin echalo. Por eso, amás d’esti concursu, nun puede faltar el tradicional concursu d’echadores de sidra, buscando al meyor “echador” o “echadora” d’ente los participantes. Un concursu que ye puntuable pal campeonatu oficial d’Asturies.

Pero ehí onde heba sidra nun puede faltar la música. Por eso repitió esti añu(como yá lo fixo per primer vegada en 2019) el concursu de Gaiteros 'Gelu Cuervo', n’homenaxe al veteranu gaiteru y animador de fiestes del mesmu nome, amás de gaiteru oficial de Les Piragües. Un concusu qu’amás de la categoría absoluta cuenta con una categoría infantil nel que podremos ver el futuru de la nuesa música, contando en dambes categoríes con premios en metálicu. El concursu ta organizáu pol departamentu de Gaita Asturiana de la Escuela Municipal de Música de Ribeseya y por Entaína Ribeseya. Y tocante a la música, nun van faltar los cantares de chigre, conciertos y bandines tradicionales p’acompañar, como nun puede ser d’otra forma, de bona música y baille a esta folixa. Y ye qu’en seis años, pola Folixa la Sidre de Ribeseya pasaren yá tolos grupos asturianos que tán a la cabeza, como Escisión, Mujeres, Andrajo, La Tarrancha, Cantaruxare, Corquiéu, ¿Aú?, etc.

Siguiendo con grandes tradiciones d’Asturies qu’acompañen un bon culín de sidra, nesta folixa podremos esfrutar d’un campeonato de valtu, una modalidá de llucha típica d’Asturies y del norte de Llión dende los sieglos XI y XII. Esti deporte consiste en “valtar” al contrariu al suelu sobre'l llombu. Según les sos regles, el lluchador o lluchadora tien que consiguir que'l llombu del so contrariu toque'l suelu. El lluchador o lluchadora va valise de la so fuercia y, más importante entá, de la so axilidá física y mental pa “valtar” al contrariu. Un valtu ye un puntu, mientres que medio valtu ye mediu puntu. Xunto con ello, nun falta’l tradicional campeonatu de bolos cuatriada.

Una folixa enllena de tradición y cultura, nun conceyu que siempres ta enllenu de tradición y cultura. Nun podía ser n’otru llau qu’en Ribeseya.