Frank Braña foi un actor asturianu, ñacíu nel añu 1934 en La Puela y conocíu polos sos papeles nes películes western, terror y acción, compartiendo escenes con Clint Eastwood, Charlton Heston o William Holden y siendo dirixíu por Sergio Leone, ente otros. Amás, la so carrera destaca por ser en delles ocasiones ún de los personaxes que muerre nes películes, con un total de 164 muertes.
L’ayandés entamó la so vida trabayando como pastor primero y dempués na mina, pero nesti postrer tabayu enfermó de silicosis, polo que tuvo que dexalo y que más tarde, nel 2004, va ser la causa pola que dexe de trabayar pa la gran pantalla. Enantes de principiar la so carrera d’actor, tamién foi chófer, tres ser declaráu non aptu pal exércitu.
Nel añu 1960 arranca la so carrera cinematográfica, onde apaez na película musical Café de Chinitas, pero l’apaición nuna película que ye anguaño, ensin duldes, de cultu, asocede nel añu 1964. Dirixíu por Sergio Leone, va participar en Por un puñado de dólares, faciendo de pistoleru de los Baxter. Tamién va participar en La muerte tenía un precio y El bueno, el feo y el malo. Dende entós, va facer una montonera de westerns y, na década de los 80, va participar na película de cine kinki Yo, “El Vaquilla”.
Nel añu 2012 va finar por mor de la enfermedá crónica que garrara de mozu, la silicosis. Al añu siguiente recibe a títulu póstumu’l Premiu d’Honra del Festival de Cine Asturianu.
