Los 80 fueron unos años míticos pa dellos campos del arte y la cultura. Los conciertos de grandes grupos xuníense a los nuevos grupos que se formaben y crecíen cuasi diariamente nuna revolución cultural ensin precedentes na historia de la humanidá. Un granín d’arena a esa gran revolución púnxolu dende Asturies el grupu Fuera de serie.
Fuera de serie foi un grupu asturianu que se formó nel añu 1984 del que formaben parte Luis Núñez como voz y guitarra, Víctor Ruiz como baxo y coros, y Amancio Sierra como batería qu’apostó por un soníu “new wave” inglés ya inicios del “after-punk”. El so primer cenciellu foi “Vanidad Masculina”, que se grabó nos Estudios Norte Xixón y se mezcló en Doubletronics, cola colaboración de Mento Hevia nel sintetizador y René de Coupeand nel pianu.
Tres l’ésitu d’esti cenciellu llegó el so primer LP nel añu 1985: “Fuera de serie” y col pasu de los años el grupu fai un cambiu: Michael J. Cohen sustituye a Amancio na batería y Luis Antiñolo ‘Kike’ incorpórase en guitarra y coros ayudando a da-y un toque más americanu al so estilu de música con esi refuerzu cultural y guitarrísticu.
El so últimu discu ye del branu de 1990: “Tour Camaleon”, que regalaben nes sos actuaciones ya incluyía cantares como “A medianoche” y “La ñeve y la montaña”. Poco dempués separáronse como grupu, anque los sos miembros siguen vinculaos al mundu de la música.
