Asocedió fai munchos años nun reinu del norte nel qu'había un imponente castiellu, el Castiellu de Gauzón, dende onde podía divisase'l mar Cantábricu. Yera una fortaleza de reis y soldaos, d'orfebres y artesanos que fabricaben armes, farramientes y ayalgues. El castiellu fúndase en dómina visigoda, nos sieglos VI-VII c.D. Foi un asentamientu lligáu a una clas social puxante que xugó un protagonismu perimportante na formación del Reinu d'Asturies. Nel añu 908, los reis Alfonsu III y Ximena ordenaron fabricar na fortaleza la Cruz de la Victoria, actual símbolu presente na bandera d'Asturies.

Nel añu 1222, el rei Alfonsu IX dona'l castiellu a la orden de Santiagu entamando asina un períodu de declive nel que surden conflictos militares. La fortaleza pierde'l so poder políticu y les sos muries entamen a esbarrumbar. HAsta que nel sielgu XV la fortaleza abandonada cae nel escaezu. O quiziabes non... El Castiellu de Gauzón, asiatiáu na llocalidá de Raíces, tien güei un nuevu puxu. Nel añu 2007, el Conceyu de Castrillón entama un proyectu de recuperación que dio los sos frutos. Les escavaciones arqueolóxiques permitieron recuperar muries de les construcciones, úniques nel norte d'España: la muria, la puerta d'entrada coles sos torres, l'alxibe, el palaciu de los reis d'Asturies, el cementeriu de la ilesia dedicada a San Salvador... Nel mesmu tiempu de la campaña de escavaciones faense visites pa conocer los trabayos arqueolóxicos. Asina, los visitantes podrán ver los oríxenes del Reinu d'Asturies y les costumes de la época medieval.

Na rodiada, el viaxeru podrá descubrir tamién el Monasterio de Santa María de Raíces, fundáu nel sieglu XV, únicu eremitoriu franciscanu y mercedariu d'Asturies y una de les primeres sedes del Conceyu de Castrillón. El tercer sábadu de cada mes, dende xunetu hasta ochobre, podremos recorrer los puestos del mercáu ecolóxicu y artesanu nel que, amás de mercas los meyores productos de la güerta asturiana, podremos prebar una bona cerveza artesano con cuñi astur, ver a neños y neños xugando na plaza, escuchar un conciertu nun espaciu privilexáu o charrar.

Amás, dende va dellos años, el conxuntu hestórixu cunta con un nuevu aliciente. La primer fin de selmana de setiembre celébrase la Selmana Medieval del Castiellu de Gauzón, que xunta conferencia, recreación hestórica, música medieval y visites guiaes. Por esto, y munches coses más, Castrillón ye "orixe", ye hestoria y futuru, tradición y modernidá a orielles del Cantábricu.

Puedes descubrir más d'esti llugar y d'otres ayalgues del conceyu de Castrillón nel nuesu espaciu na Feria de Muestres de Xixón.