German Horacio Robles San Agustín foi un actor asturianu de cine, televisión, teatru y de doblaxe, perteneciente a la Época d’Oru del cine mexicanu. Ñació nel añu 1929 na villa de Xixón, pero por mor de la Guerra Civil emigró cola so familia a Méxicu onde principió cola so carrera d’actor a la edá de 17 años.
La so trayectoria ye enforma conocida polos sos papeles en películes de terror (tanto que foi homenaxeáu en dellos festivales), como El Vampiro, o la so continuación, El ataud del vampiro, pero tamién poles obres de teatru, como La Dama de Negro, conocida por ser una de les obres de teatru con más tiempu na cartelera mexicana, allargándose hasta los 18 años de reproducción. Amás d’estes obres, destaquen papeles bien curiosos na so trayectoria, como l’apaición en dellos capítulos del programa popular mexicanu El Chavo del 8, interpretando a Don Román, o'l doblaxe en películes modernes, como Piratas del Caribe, poniéndo-y voz nel doblaxe llatinoamericanu a ún de los protagonistes, Davy Jones.
Del actor hai una montonera d’anécdotes curioses: yera nietu del escritor asturianu Pachín de Melás ya intentó conseguir la nacionalidá mexicana hasta en 10 ocasiones y enxamás pudo llograla. Pero la más curiosa de toes ye que, tres l’ésitu de la película El Vampiro, naide lu contrataba por venceyar la so figura a la d’un vampiru. Nel añu 2010 fizo el so últimu trabayu, El Secreto, y dende entós, los problemes de salú foron los que lu allonxaron de los escenarios. Morrió nel añu 2015 en Ciudá de Méxicu a la edá de 86 años.
