De xuru que caminasti dalguna qu’otra vegada peles cais del anfiteatru de Cuideiru, alcontrando nos balcones el típicu curadiellu de los pescadores. De xuru que tamién sentisti dalguna pallabra qu’escapaba a la to conocencia y eso ye porque nesti pueblín pesqueru hai un dialectu que, según munchos estudiosos, provien del llegáu que dexaron na zona los vikingos, pueblu nórdicu que s’asentó na costa del occidente mientres el sieglu IX a XII, según los documentos medievales asturllioneses.

La hestoria cunta que nel 844 una oleada de vikingos llegó a Xixón y poco dempués a Galicia, onde’l rei Ramiro I ganó-yos la partida. D’esto ñaz la lleenda na que s’afirma que los normandos llegaron a Cuideiru, onde quedaron y ficieron un mecigayu de los sos vezos y costumes colos llocales. Ye por eso polo que dalgunos dicen que na villa pixueta les persones tienen rasgos asemeyaos a los escandinavos, amás de tener un númberu bien altu de xente roxo.

D’esto nun hai nengún restu arqueolóxicu que confirme esta lleenda, pero ye una hestoria que apaez muncho na hestoria del conceyu y, en rellación cola xerga pixueta, otros munchos filólogos nieguen que te venceyada a la presencia vikinga nes costes d’Asturies.

Sicasí, la cultura del conceyu Cuideiru tien bien de riqueza, como por exemplu la tradición pesquera, los caízos o mesmo los vaqueiros d’alzada, asina que si vas pel famosu anfiteatru, alcuérdate que la villa ye un llugar hestóricu.