Ivan García Cortina ye un ciclista ñacíu nel añu 1995 en Xixón, anguaño corredor del Movistar Team y especializáu en clásiques de primavera y sprints. El so percorríu nel mundu del ciclismu nun va principiar hasta que cumpla los 15 años, cuando entama a formar parte de la Escuela Ciclista de Les Mestes en Xixón, anque usaba con frecuencia la bicicleta de más mozo. Nesti añu va ganar 12 carreres y al añu siguiente va ser Campeón d’España junior.
Cortina entamó la so carrera ciclista profesional nel añu 2015 nel equipu checu AWT-GreenWay onde coincidió con otru español, Álvaro Cuadros. Al añu siguiente l’asturianu va cambiar d’equipu pasando a integrar les files del Klein Constantia de categoría continental, filial del equipu profesional QuickStep-AlphaVynil y onde coincidió con xóvenes promeses del ciclismu profesional como Enric Mas (actual compañeru d’equipu), Remi Cavagna o Erik Baska. A finales d’esa temporada, Cortina dio’l saltu al primer equipu, tando como stagiare varios meses, onde consiguió ganar una etapa de la Carrera de la Solidaridad y de los Campeones Olímpicos en Polonia. Al siguiente añu, en 2017, vuelve a cambiar d’equipu pasando a les files del Bahrain-Mérida, con quien debuta en La Vuelta a España y en 2018 consigue la primer victoria como profesional, ganando una etapa del Tour de California al sprint, mesmo que nel 2020, onde algama una victoria d’etapa na París-Niza.
Dende l’añu 2021 ye ún de los corredores del equipu navarru Movistar Team, onde ye’l líder del equipu de les clásiques de primavera y gregariu del líder principal del equipu, Enric Mas.