En 2025, los amantes del cicloturismu van tener una nueva cita nel calendariu con La Vaqueira, un eventu que se va celebrar el 29 de xunu n'Asturies. Esta prueba va percorrer los conceyos de Valdés, Salas y Cuideiru, col propósitu de difundir la rica cultura vaqueira, bien enraigonada nel occidente de la rexón.
Pa la so primer edición, la marcha va cuntar con dos percorríos diseñaos afechos a distintos niveles de ciclistes. El más curtiu, denomináu La Vaqueira, toma 95 kilómetros, mientres que'l más esixente, La Vaqueirona, estiéndese hasta los 130 kilómetros, con notables diferencies en desnivel acumuláu.
L'itinerariu de La Vaqueira va partir de L.luarca, xubiendo hasta l'altu de Mones, onde se va ufiertar avituallamientu líquidu. Más p'alantre, nel altu de San Roque, los participantes van poder reponer fuerces con un avituallamientu sólidu. Finalmente, tres un últimu tramu de 30 quilómetros, los ciclistes van tornar a la villa costera, superando un desnivel total de 1.450 metros.
Pela so parte, el percorríu La Vaqueirona añede aprosimao 35 quilómetros estra y 600 metros más de desnivel acumuláu. Anque comparte la mayor parte del trazáu con La Vaqueira, la diferencia llega a la fin: cuando los participantes de la ruta curtia tornen a la villa, quien opten pol desafíu mayor tendrán d'enfrentase al altu de Aristébanu. Nel so cumal van atopar un avituallamientu enantes d'entamar el descensu definitivu escontra L.luarca.
Magar el cicloturismu ye la exa central d'esta prueba que debuta nel calendariu, l'eventu va más allá del deporte. Los sos organizadores busquen dar visibilidá a la cultura vaqueira, fondamente enraigonada nos conceyos que traviesa la ruta. Esti pueblu, históricamente marxináu pola so forma de vida nómada, desenvolvió una identidá única que sigue presente na tradición del occidente asturianu.
Pa somorguiar a los participantes nesti heriedu cultural, amás de la competición, van entamase actividaes paraleles. El sábadu va ser el día clave, cola entrega de dosales nel Altu de San Roque, acompañada d'eventos que van dexar a los asistentes conocer de cerca la riqueza de la cultura vaqueira.