Llega a BIOPARC Acuariu de Xixón la esposición “Venenu: Naturaleza Letal”. L'amuesa, itinerante per Europa, va permanecer en Xixón hasta'l 8 d'avientu y convida a somorguiase nel mundu del velenu. Esta amuesa dexa adentrase nel universu de los animales velenosos y entender el so papel esencial na naturaleza, la ciencia y la medicina con 18 terrarios que yá son el llar d'alredor de 40 animales.
Estos terrarios, nos que se recreen los hábitats d'orixe de los animales, tán doblemente acristalaos por seguridá, pa evitar fugues o accidentes. Ente los protagonistes de la esposición atopen la vilba negra, una de les arañes más tarrecíes pola so potente neurotoxina; la xaronca dorada, que'l so venenu ye abondo pa matar a diez persones con una sola gota; la víbora del Gabón, colos caniles más llargos de cualquier culiebra venenosa; la cascabel motuda, capaz de detectar el calor de les sos preses con una precisión estelante; o el monstruu de Gila, un llagartu venenosu que la so saliva inspiró melecines utilizaes nel tratamientu de la diabetes de tipu 2.
Amás, la esposición trai consigo una fascinante colección d'invertebraos venenosos. Por casu, la tarántula salmón rosada de Brasil, una de les más grandes del mundu. O la tarántula de rodíes coloraes, que Hollywood fixo famosa y la vimos nes películes d'Indiana Jones, Harry Potter, James Bond o, inclusive, en Solo en casa.
Pero na esposición nun se centra namás na letalidad d'estos animales y munchos otros. Tamién afonda na ciencia, la medicina y el caltenimientu de les que son dalgunes de les especies más sorprendentes y peligroses del planeta.
Por eso, col oxetivu d'educar y sensibilizar sobre la importancia tamién d'esos animales, la esposición ufierta una visión reveladora sobre cómo los venenos influyeron nel desenvolvimientu de tratamientos médicos innovadores. Sustances estrayíes d'estos animales dieron llugar a fármacos pa tratar enfermedaes como la hipertensión, el dolor crónicu y, inclusive, dellos tipos de cáncanu.
“Velenu: Naturaleza Letal” nun ye namás una oportunidá pa conocer de cerca a estes fascinantes criatures, sinón tamién una llamada d'atención sobre la necesidá de protexer estes especies y los sos hábitats. Magar de la so peligrosidá, dalgunos d'estos animales tán en peligru d'estinción por cuenta de la destrucción de los sos ecosistemes naturales. La esposición trai a un primer planu la conexón ente la biodiversidá y la salú humana.