De xuru que conoces al pintor singular y famosu Salvador Dalí, con obres como La persistencia de la memoria o La metamorfosis de Narciso, obres maestres del autor. Pero lo que de xuru que nun conocíes ye que una ilesia llocalizada n’Asturies foi inspiración pal artista nún de los sos cuadros.
Discurso sobre la forma cúbica de Juan de Herrera ye’l nome que lleva esa obra d’arte fecha pel mesmu Salvador Dalí nel añu 1960. N’ella, podemos alcontrarnos con un cubu onde se reproduz la piedra llaberíntica que’l rei Silo mandó facer nel sieglu VIII y que s’alcontraba na iglesia praviana de Santianes de Pravia, onde anguaño puede vese una reproducción d’esta piedra enriba de la puerta d’entrada al templu, mientres que l’orixinal ta nel Muséu Prerrománicu que s’alcuentra al llau de la ilesia.
Dalí, gran conocedor de la hestoria del arte, plasmó la idea d’esta piedra que-y llamó l’atención enforma, probablemente poles capacidaes matemátiques que tien, siendo esta d’un momentu nel que’l 95% de la población yera analfabeta. Una obra na que se repite hasta 259 veces la frase Silo Princeps fecit y que tituló col discursu del arquitectu famosu Juan de Herrera, principal esponente del llabor nel Palaciu de El Escorial.
La obra del pintor catalán puede visitase nel Muséu d’arte Reina Sofía, en Madrid, y pertenez a la época de madurez artística del autor, nos últimos años de la so vida. Prerrománicu asturianu y surrealismu nuna sola obra d’arte paez imposible, hasta que llegó’l singular trabayu de Salvador Dalí.
