En Cadavéu, un pequeñu pueblu del conceyu de Valdés, el branu nun termina hasta que se celebra La Regalina. Cada últimu domingu d'agostu, los vecinos y cientos de visitantes converten el Campu de la Garita, al borde d'un cantil, nun escenariu onde s'entemecen devoción, folclor y convivencia. Ellí, frente a la ermita blanca de Santa María de Riégala y col Cantábricu de telón de fondu, Asturies amuésase n'estáu puru.
La fiesta tien el so orixe en 1931 gracies al Padre Galo, conocíu tamién como Fernán Coronas. Esti sacerdote y poeta topó la pequeña imaxe de la Virxe nun trasteru y decidió rescatar la devoción popular que l'arrodiaba. Nun se conformó con recuperala: diseñó toa una romería con pregón n'asturianu, bailles y cantares que güei, casi un sieglu dempués, siguen marcando la identidá de la celebración.
¿Cómo ye La Regalina?
La xornada arranca ceo, nel barriu de La Rapa. Dende ellí parte una comitiva de romeros vistíos con traxes típicos, acompañaos por carroces afataes con flores, banderes y los característicos ramos d'alfiladas, unos bollos duces que se convierten en símbolu festivu. La procesión, colorida y allegre, xube hasta la Garita, onde aguarda la ermita. El camín ye yá un espectáculu: gaites, panderetes y cantares anuncien que'l pueblu ta de fiesta. Cuando los romeros algamen el campu, un pregoneru toma la palabra. Nun lo fai en castellán, sinón na variante local del asturianu, la faliecha valdesana, como quixo'l Padre Galu. Ente humor, crítica y devoción, el discursu arranca sorrises y aplausos, reafitando esi calter popular que fai de La Regalina daqué más qu'un actu relixosu.
El momentu más esperáu llega cola Danza Prima, el baille colectivu que'l mesmu sacerdote introdució na fiesta. Homes y muyeres, coyíos de la mano, formen un gran corru y entonen melodíes ancestrales de la qu'avancen adulces en círculu. Ye una imaxe poderosa: la tradición que xune a xeneraciones, col mar rompiendo a pocos metros. Dempués celébrase la misa solemne y la procesión de la Virxe, siguida con un respetu que choca cola allegría de los momentos previos. Terminaos los actos llitúrxicos, el campu tresfórmase nun inmensu merenderu. Families enteres espleguen manteles y comparten tortielles, empanaes y botelles de sidra. La comida campestre ye, en realidá, un segundu ritual: el de la convivencia, onde s'entemecen los vecinos de tola vida colos visitantes que repiten añu tres d'añu. La tarde avanza ente música y bailles folclóricos. Actúen agrupaciones de toa Asturies, que recuperen pieces como el corri-corri, una danza de raigaños perantiguos. Nun falta la tradicional rifa de las alfiladas, qu'ente rises terminen en manos de los afortunaos. Y cuando cai la nueche, la fiesta enllárgase cola verbena popular, que convierte'l cantil nuna pista de baille abierta al cielu estrelláu.
Anque'l domingu ye'l gran día, La Regalina estiéndese dellos díes más. El martes siguiente, conocíu como'l Día del Bollu Preñáu, los vecinos axúntense de nuevu al rodiu d'otra especialidá gastronómica asturiana: pan relleno de chorizu, acompañáu de sidra. Una forma sabrosa de despidir la romería hasta l'añu siguiente.