Anque seya Navidá, les escapaes pelos requexos d’Asturies nun pueden faltar. Y ye que güei vamos falavos d’una escapada perguapa a Cuadonga, onde vais poder esfrutar de los belenes navidiegos, nuna propuesta de ruta nomada La Ruta de los Belenes.
Cada añu, nel Santuariu qu’alberga la famosa Santina, la virxe de Cuadonga, espónense dellos belenes por mor de les feches navidiegues. Na Santa Cueva, nel muséu, na escolanía, na tienda, na Casa Capitular... cada requexu cunta col so propiu nacimientu, hasta llegar a un total de 12. Trátase de la tradicional Ruta de los Belenes de Cuadonga, una iniciativa que se convierte nun centru d’atención pa la visita del llugar, sobre manera pa los más pequeños de la casa, qu’enllenen mientres estos díes festivos el Santuariu. La esposición d’estes 12 pieces navidiegues ye un trabayu fechu pol personal del Santuariu, onde toos collaboren pa da-y a Cuadonga un toque bien navidiegu.
El belén más monumental ye’l de la Santa Cueva, que tien más de 130 figures y pieces y una réplica de la ponte romana de Cangues d’Onís. Amás, estos belenes s’estrenen col tamién tradicional conciertu de la Escolanía y col encendíu de les lluces qu’adornen les cais del real sitiu de Cuadonga.
Asina qu’estes feches navidiegues, avérate a Cuadonga a esfrutar de los belenes.
