Hai vegaes qu'una de les nueses pasiones, el senderismo, vese atayada polos curiaos familiares. Por eso, pa que tengas una bona conciliación familiar ensin dexar de llau la to afición favorita, traémosvos una ruta nel conceyu de Piloña pa esfrutar colos más pequenos de la casa.

La Ruta del Chorrón, asitiada nel conceyu de Piloña, ye una opción bien bona pa realizar con neños, yá que se trata d'un paséu con una dificultá mínima y de distancia curtia. Amás, cuenta con un área recreativa con xingadorios, onde vas poder comer y que los más pequenos pasen una ratu xugando. Esti llugar atópase mui cerca de la cascada, un espectáculu tantu pa ellos como pa nós, los mayores.

La ruta empieza en Villamayor, con espaciu abondu pa dexar el nuesu vehículu. Dende esti sitiu, va haber indicaciones al área recreativa, que nos llevará al mentáu llugar y a la cascada en pasando un par de pontes de madera y llegar a un monte asitiáu xuntu al ríu Pequenu, con un altar que recueye a la Virxe de Cuadonga y delles cuerres que recoyíen d'antiguo l'almacenaxe de les castañes. Ensin dulda, una ruta bien guapa onde tradición y naturaleza fúndense n'unu.