L’amagüestu ye una celebración asturiana na que se comen castañes asaes, acompañaes de sidra dulce, facíendose xeneralmente nel mes de payares y con gran tradición en tola contorna asturiana. Esta celebración ye perantigua, nun conocemos un orixe claro d’ella, pero sí que vien de les tradiciones y fiestes celtes, dientro de les fiestes agraries, típiques nos tiempos prehistóricos y protohistóricos.

Según les vieyes creyencies, la castaña yera'l símbolu de l'ánima de los difuntos. Cada castaña que se xintaba lliberaba un ánima del purgatoriu. N'otros munchos llugares celébrase'l día 1 de payares, al mesmu tiempu que la fiesta celta Samhain, na que se rinde cultu al fueu y al so efeutu purificador sobre dellos malos espíritus.

El día 1 de payares, los celtes acallentaben los poderes del otru mundu, y propiciaben qu'hubiere abonda collecha celebrando'l Samhain, la que yera, pa unos, l'entamu del iviernu, y pa otros, la fin del branu. En tou casu, yera l'entamu d'un nuevu ciclu y un periodu de fondera comunicación ente esti y l'otru mundu. Aconceyábase muncha xente porque yera una fiesta obligatoria. Dicíase que quien nun diba podía enlloquecer. Neses mesmes feches, los romanos celebraben les saturnales.

La costume de xintar castañes asaes con motivu de la fiesta d'ánimes faise en tola zona norte de la península ibérica, como Galicia (col nome de magosto), Cantabria (col nome de magosta), País Vascu (gaztainerre ou gaztañarre), en Llión y Zamora, y mesmo en Cataluña, col nome de castanyada. Tamién ye una fiesta mui popular en Portugal, col nome de magusto. Na Aldeia Viçosa (del conceyu d'A Guarda), celébrase o Magusto da Velha.