Cada selmana vas poder atopar en VerAsturies.com les recetes llambiones de la escritora Beatriz Rato.
Pa la pasta: aceite, vino blanco, llechi (todo a partes iguales), un plizcu de sal, un paquete de formientu, dos boles de mantega, farina.
Pal rellenu: mediu kilu de nueces molíes, 250 gramos d’azucre, un vasín d’anís, mediu vasín de llechi o d’agua.
Pa freyir: abondo aceite d’oliva, azucre molío.
Mecer tolos ingredientes menos la farina y el formientu; acercalo al fueu nun cazu hasta desfacer la mantega y movelo con una cuyar de palu. Colocar la farina na meseta mecío col formientu formando un volcán; dir añadiendo a pocoñinos el líquidu trabayándolo hasta dexar fina la masa (Tien de ser una pasta consistente y poco dura). Dexar reposar media hora nuna fuente tapada con un pañu cerquina d’una fonte de calor.
Revolver tolos ingredientes del rellenu con curiáu cola cantidá d’anís y agua o llechi precisa pa que la miesta nun seya nin mui dura nin mui blandia. Espurrir la pastia de siguío y rellenar cachinos de pastia cola miesta de les nueces. Nel borde pasar un pincel con agua pa que apegue bien y polos llaos estrapar con un tenedor pa dayos un poco de forma. Freyir n’aceite caliente y espolvoriar con azucre molío.
