Cada selmana vas poder atopar en VerAsturies.com les recetes llambiones de la escritora Beatriz Rato.
Ingredientes:
Pa la masa: un güevu, 50 gramos de mantega, 3 cuyaraes de farina, dos cuyaraes de llechi, una cuyarada d’azucre.
Pa la crema: 3 taces de llechi, 4 cuyaraes d’azucre, un palu de canela, una corteya de llimón, 3 cuyaraes de “Maicena”, una yema.
Pa la cubierta: 3 plátanos, mermelada de piescu o de cirigüella, una clara, dos cuyaraes d’azucre.
Procedimientu:
Facer una masa con tolos ingredientes ensin trabayala muncho y estender y asitiar nun moldiu, cubriendo la base y los llaterales. Cocer nel fornu a 200 graos venti minutos.
Poner a calentar nun cazu dos taces y media de llechi con un palu de canela, la corteya de llimón y les cuatro cuyaraes d’azucre.
Nuna taza, cola llechi que sobró, desfacer les cuyaraes de “Maicena” y la yema; añidir a pocoñinos a la llechi en ferviendo y revolver bien un cachu. Echar porriba la pastia cocío.
Pulgar y cortar los plátanos en llámines fines y asitialos sobre la crema, cubrir de siguío con una capa fina de mermelada. Cocer nel fornu a 200 graos mientres venti minutos. Mientres ta nel fornu llevanta la clara de güevu a puntu de nieve coles dos cuyaraes d'azucre..
Cuando se cociera la tarta, sacar del fornu y afatales col merengue; introducir de nuevu nel fornu por que se dore col gratinador. Dexala esfrecer y desmoldar.
