Ta nel centru d'Asturies y mui cerca del mar. L'agua marca la so vida y el so nome, que deriva de la bayura de corrientes que percuerren el so suelu y sosuelu. El ríu Nora dibuxa parte de la so orografía, y esto fai que comparta los sos meandros col vecín conceyu d'Uviéu, y que'l so más importante monumentu prerrománicu, la ilesia de San Pedro de Nora, lleve'l nome d'esti carismáticu ya históricu ríu. Pero Les Regueres tien, amás de prerrománicu, un notable románicu y unu de los sos más señeros exemplos ye la ilesia de Valsera, mesmo qu’unes termes romanes en Valdunu, que son una auténtica maraviya. Les Regueres ye tierra de caminos, de batalles -la de la Independencia, la Guerra Civil- entá queden les buelgues de delles… Namás has visitar visitar esti conceyu pa conocer esto y muncho más.
San Pedro de Nora
Perteneciente al arte asturiano, la so primer referencia documental ta nuna donación d'Alfonso III, nel añu 905 a la Catedral d'Uviéu. Declarada Monumentu Nacional en 1931, foi destruyida en 1936 por una quema y reconstruyida en 1955-56 so la dirección de Luis Menéndez Pidal, momentu nel que s'añedió la torre campanariu asitiada al llau de la ilesia. Convencionalmente, al edificiu se -y adscribe al periodu constructivu d'Alfonso II, yá avanzáu'l so reináu, poles sos relaciónes estilístiques con modelos d'edificios eclesiales como Santuyano o Santa María de Bendones. Presenta planta basilical de trés naves, con trés ábsides, llevantada sobre muries de mampostería con sillares nes esquines. Nel interior de la Ilesia allúgase una imaxe de San Pedro na cátedra, datada alredor del s. XVII y apocayá restaurada.
Termes romanes de Valdunu
Recién esploraciones arqueolóxiques llevaes a cabu na banda meridional de la Ilesia de Valdunu sacaron a la lluz los restos d'un importante conxuntu termal de dómina romana escepcionalmente calteníu. Les escavaciones arqueolóxiques dexaron documentar una parte del Caldarium y el Tepidarium d'unes Termes de notable entidá que respuenden a la orientación canónica encamentada polos trataos d'arquitectura romana. La so construcción data de la segunda metá del sieglu I. Sobre estos restos romanos se superpone una necrópolis de dómina Medieval y Moderna, acomuñada a socesivos templos de dichos periodos que s'asitiaron sobre l'edificiu termal.
Meandros del río Nora
Declaráu Monumentu Natural en 2003, alcuéntrense nel tramu final de la cuenca del ríu Nora, dende'l pueblu de San Pedro de Nora y hasta la so desembocadura nel ríu Nalón nel banzáu de Priañes, ente los conceyos d'Uviéu y Les Regueres. Con una vexetación de ribera na que se dan especies de gran valor como'l sauce blancu o los cañaverales anfibios, supon un escepcional abellugu pa numberoses especies d'aves migratories.